Матур һәм ҡуйы керпекле булам, тиһәң...

Борон-борондан оҙон керпектәр матурлыҡтың бер билдәһе булып һаналған. Йырҙарҙа ла керпектәрен елпелдәтеп алды, тип йырланыла бит. Әгәр тәбиғәт бындай матурлыҡ бирмәгән икән, уны еңел генә “үҫтереп” була. Бында инде оҫта ҡуллы Юлиә Вәлиева ярҙамға килер. Әйткәндәй, Юлиәне Баймаҡ ҡалаһы һәм районы һылыуҡайҙары ғына түгел, хатта Өфө ҡалаһының ҡатын-ҡыҙҙары ла был өлкәнең оҫтабикәһе булараҡ яҡшы белә. Был юҡҡа ғына түгел, ул ошо һөнәргә баш ҡалабыҙ Өфөлә йәшәгән саҡта өйрәнеп ала. 

Юлиә сығышы менән Үрге Яйыҡбай ауылынан. Вәлимә һәм Ринат Вәлиевтарҙың ҡотло ғаиләһендә төпсөк бала булып донъяға килә. Бала саҡтан тырыш, сая ҡыҙ урта мәктәпте тамамлау менән БДУ-ның Сибай институтына уҡырға бара. Инглиз теле уҡытыусыһы һөнәрен үҙ ләштергән йәш белгес Өфөгә юллана. Ҡала мәктәптәренең береһендә ул инглиз теленән белем бирә, социаль педагог та булып эшләй. Шулай уҡ Өфө ҡалаһы Совет районының мәғариф бүлегендә туған телдәр буйынса методист та була. Тап ошо йылдарҙа ул кейәүгә сығып, бер-бер артлы ике улына – Вадим менән Эмилгә ғүмер
бүләк итә. Өйҙә декрет ялында ултырған саҡта ул “керпек үҫтереүсе” һөнәре буйынса махсус курста уҡып ала. Тиҙҙән был шөғөлө уға яҡшы табыш та килтерә башлай. Тағы бер нисә йылдан йәш ғаилә Баймаҡҡа күсеп ҡайта. Бында улар ике ҡатлы йорт һатып ала, өсөнсөгә улдары тыуа. Оҫта ҡуллы мастер тыуған ерендә лә тиҙ арала үҙ клиент базаһын булдыра. Тәбиғәте менән тынғыһыҙ йәш ҡатын хыялындағы йортто һатып алырға ҡарар итә. Тиҙҙән был теләген дә бойомға ашыра. 

Яҡшы килем алыу теләгенән тыш күңел талабы ла бар бит әле. Һәр саҡ яңылыҡҡа ынтылған Юлиә Ринат ҡыҙы йәйәнән уҡ атырға өйрәнә. Баймаҡ уҡсылары ла уны ихлас ҡаршы ала. Уҡсылар менән ул төрлө бәйгеләргә, ярыштарға йөрөй. Баймаҡ, Әбйәлил райондарында үткән конкурстарҙа призлы урындар алғас, дәртләнеп китә. Татарстандың Алабуға ҡалаһындағы Бөтә Рәсәй йәйәнән уҡ атыусылар бәйгеһендә ул 1-се урынды алды. 

Юлиә һылыуҙың тағы бер яратҡан һөнәре бар. Ул бала саҡтан бейеү менән мауыға. Шуға ла “Саптар” өлгөлө бейеү студияһы 18-40 йәшлектәр өсөн айырым төркөм булдырғас, ул шатланып барып яҙыла. Әле бында улар “Байыҡ” республика телевизион бейеү конкурсына әҙерләнә. 

Юлиә Вәлиева – өс улының яратҡан әсәһе лә. Улдарының киләсәге өсөн борсолоп, хәстәрләп торған әсә уларҙы төрлө яҡлап үҫтерергә тырыша. Өлкән улы Вадим бокс менән шөғөлләнә. Икенсе улы Эмиль әсәһе кеүек “Саптар” өлгөлө бейеү студияһында бейей. Әйткәндәй, Вадим менән Эмиль – ҡаланың 5-се мәктәбе уҡыусылары. Икеһенең класында ла Юлиә ата-әсәләр комитеты ағзаһы булып тора. 3 йәшлек улы Алмаз балалар баҡсаһына барырға әҙерләнә. 

Шулай итеп, гүзәл ханымдар, әгәр һеҙ ҡатын-ҡыҙҙарҙың биҙәге булған матур һәм ҡуйы керпекле булып байрамыбыҙҙы ҡаршы алырға теләһәгеҙ, мотлаҡ 1 8 905 353 69 91 (ватсап) телефоны аша оҫтабикә Юлиәгә яҙылығыҙ. Йылдар үтеү менән ҙур тәжрибә туплаған оҫта һеҙҙе ни бары 1,5 сәғәт эсендә елпелдәп торған матур керпекле итеп сығарыр. 

Эльмира Кейекҡужина.