Киләсәкме?

Ирек КИНЙӘБУЛАТОВ

КИЛӘСӘК
Киләсәкте, киләсәк ул, тиҙәр,
Киләсәкте тиҙәр, етәсәк.
Ләкин кем һуң беҙҙе
Киләсәккә алып киләсәк?
Ҡул ҡаушырып әгәр көтөп ятһаҡ,
Килерме икән беҙгә киләсәк?
Улай булһа, тик ҡалырбыҙ унан,
Ә киләсәк ары еләсәк.
Киләсәк бит үҙе килмәйәсәк,
Көтөп алмаҫ уны берәү ҙә.
Ул бит – көрәш, ус төбөндә һөйәл,
Ул – туҡтауһыҙ яныу, эҙләүҙәр.
Беҙ эшләйһе иртәгәгә ҡалһа,
Иртәгеләр ғәфү итмәҫтәр.
Киләсәкте беҙ бит килтерәбеҙ,
Киләсәк ул – бөгөн, иптәштәр!