Завод сәғәтенә йөҙ тоннанан ашыу асфальт етештерәсәк

Юл мәсьәләһе – халыҡты иң ныҡ борсоған проблемаларҙың береһе. Быны беҙ республика Башлығы Радий Хәбировҡа яҙылған мөрәжәғәттәрҙән дә, беҙҙең редакцияға килгән шылтыратыу-хаттарҙан да яҡшы беләбеҙ.

Был йәһәттән беҙҙе ҡалабыҙҙа яңы асфальт-бетон заводы монтажлау башланыуы бик тә һөйөндөргәйне. Сөнки заманса завод беҙҙең районды ғына түгел, ә тотош Урал аръяғын юлдар һалыу һәм ремонтлау өсөн юғары сифатлы асфальт менән тәьмин итәсәк.

Хәҙерге ваҡытта унда эштәр нисек бара һуң? Баймаҡ ДРСУ-һы начальнигы урынбаҫары Александр Пономарев әйтеүенсә, әлеге ваҡытта заводты сафҡа индереү буйынса эштәр дауам итә.

Яңы асфальт-бетон заводындағы эштәрҙе үҙ күҙҙәребеҙ менән тағы ла күреү өсөн унда юл алдыҡ. Беҙҙе мастер Мансур Мәжитов ҡаршы алды. “Эйе, әлеге ваҡытта асфальт-бетон заводын сафҡа индереү буйынса эш әүҙем дауам итә. Был эш Баймаҡ ДРСУ-һы эшселәре тарафынан башҡарыла һәм ярҙамға Күгәрсен районынан бер кран килде. Киләсәктә был завод сәғәтенә 160 тонна самаһы асфальт етештерәсәк”.

Эйе, ҡеүәтле асфальт-бетон заводы юлдарға ҡағылышлы күп проблемаларҙы хәл итергә ярҙам итәсәк. Шуға күрә тиҙҙән үҙ асфальтыбыҙ буласаҡҡа һөйөнөргә генә ҡала.

Баймаҡтарҙың асфальт – бетон заводы тураһында фекере бер: “Беҙҙең районды ғына түгел, тотош Урал аръяғын сифатлы асфальт менән тәьмин итерлек завод булғас – бик шәп. Баймаҡтар өсөн өҫтәмә эш урындары ла булыр, тип ышанабыҙ”.