Ҡоро үлән янып киткән

13 апрелдә Ҡырмыҫҡалы районында үлән янып киткән. Башҡортостан буйынса Ғәҙәттән тыш хәлдәр министрлығының матбуғат хеҙмәтенән хәбәр итеүҙәренсә, янғындың майҙаны 1 гектар тәшкил итә. Р-240 трассаһы буйында, 46-сы саҡрым тирәһендә үлән яна. Ғәҙәттән тыш хәлдәр министрлығы көсө менән һүндереү эштәре алып барыла.

Ведомство мәғлүмәттәре буйынса, 13 апрелгә республиканың урман фондында 2-се, 3-сө, 4-се класлы янғын хәүефе фаразлана. Өс муниципалитетта: Архангел, Дыуан һәм Стәрлетамаҡ райондарында иһә 4-се класлы янғын хәүефе.

«Тәүлек эсендә дөйөм майҙаны 57,2295  гектарҙа ҡоро үлән яныуҙың 50 осрағы теркәлгән. Һүндергәндәр. 2023 йылдың башынан республика биләмәһендә бөтәһе 311,9868 гектар майҙанда ошондай 339 янғын сыҡҡан», — тип билдәләнеләр Башҡортостан Республикаһы буйынса Ғәҙәттән тыш хәлдәр министрлығында.