Атайҙар тәбрикләнде

Бөгөн Өфөлә Йәмәғәт палатаһы VI «Атай батырлығы» конкурсына йомғаҡ яһаны. Сара Атайҙар көнөнә арналды. Бүләкләү тантанаһында ҡатнашыу өсөн лауреаттарҙан һәм уларға ярҙам итеү төркөмөнән тыш, абруйлы ҡунаҡтар — Башҡортостан Башлығы хакимиәте етәксеһе вазифаһын башҡарыусы Искәндәр Әхмәтвәлиев, Башҡортостандың ғаилә, хеҙмәт һәм халыҡты социаль яҡлау министры Ленара Иванова, республика Башлығы советнигы, Башҡортостандың үҙ-ара хеҙмәт ойошмаһы ветерандары Ассоциацияһы рәйесе Оскар Ситдиҡов, Рәсәй Геройы Денис Чернавин, төбәк Дәүләт Йыйылышы рәйесе урынбаҫары Тамара Танһыҡҡужина, Дәүләт Йыйылышы депутаты Шамил Вәлиев һәм башҡалар саҡырылды.

Республика Башлығы Радий Хәбиров та премия лауреаттарына сәләмләү хаты ебәрҙе. Ул ошо көндәрҙә Мәскәүҙә командировкала. Үҙенең ҡотлауында ул аталыҡ мөхәббәтенең мөһимлеген билдәләне.