Баймаҡ районында янғынға ҡаршы сикләү оҙайтылды

Әбйәлил, Баймаҡ һәм Бөрйән урмансылыҡтары биләмәһенә транспорт менән инергә ярамай. Башҡортостан урман хужалығы министрлығының матбуғат секретары Найлә Зарипова хәбәр итеүенсә, хәҙер был саралар 6 июлгә тиклем ғәмәлдә ҡала.

«Сикләү урман үҫентеләрен ҡуртымға алыу һәм һатыу-һатып алыу килешеүенә ярашлы урмандарҙы һаҡлау, тергеҙеү буйынса сараларҙы тормошҡа ашырған юридик шәхестәргә һәм граждандарға ҡағылмай. Әммә туристарға һәм һунарсыларға ҡәтғи ҡағыла. Был осорҙа урман фонды биләмәләрендә тикшереү ойошторола»,  – тип белдерҙеләр ведомствола.

Урмансылыҡтарҙа янғынға ҡаршы режим 15 июнгә тиклем ғәмәлдә ине.