Аккаунтыңды биреп торорға ла, һатырға ла ярамай!

Рәсәй Эске эштәр министрлығы социаль селтәрҙәрҙәге йәки мессенджерҙағы аккаунтын ҡуртымға биреү кеүек эш хаҡының законлы булмауы тураһында иҫкәртте. Интернетта сит кешеләрҙән шундай  шикле тәҡдимдәр килә. Ведомствоның рәсми вәкиле Ирина Волк аңлатыуынса, һатылған йәки ҡуртымға алынған иҫәп яҙмалары мутлашыу өсөн генә түгел, ә терроризм, экстремизм, аҡса талап итеү кеүек башҡа ауыр һәм айырыуса ауыр енәйәттәрҙе ойоштороу өсөн дә ҡулланылыуы бар.

Социаль селтәрҙәрҙә һәм мессенджерҙарҙа ҡулланыусылар махсус программалар ярҙамында башҡа ҡулланыусылар тураһында мәғлүмәт ала ала, шул иҫәптән иҫәп яҙмаһын теркәү датаһы һәм йәшәгән илен. Һөҙөмтәлә енәйәтселәр Рәсәйҙә бер нисә йыл элек теркәлгән аккаунттарҙы ҡулына төшөрөргә маташа. Уларҙы һатып алалар йәки билдәле бер ваҡытҡа ҡуртымға алалар. Шул уҡ ваҡытта енәйәт бизнесына хатта балалар ҙа йәлеп ителә. Уларға тәҡдимдәр менән йыш ҡына онлайн-уйындар чаттарында һәм популяр телеграм-каналдарҙа мөрәжәғәт итәләр.

Ирина Волк Кострома өлкәһенән үҫмер менән миҫал килтерҙе. Ул 1500 һумға сит ил кол-үҙәгенә рәсәйҙәргә шылтыратыу өсөн үҙенең аккаунтын бирә. Аноним эш биреүселәр килешеүҙең хәүефһеҙ булыуына ышандыра. Әммә һөҙөмтәлә уҡыусы ойошҡан  енәйәт төркөм составында ҡылынған енәйәттәрҙә ҡатнашыусы булып китә..