Машинаһын һатып, аҡсаһын аферистарға күсергән

Аферисттар тәүҙә пенсионерҙы уларға йыйып барған аҡсаһын күсерергә, ә һуңынан машинаһын һатырға һәм кредит алырға мәжбүр итә

Иртән 65 йәштәге ҡатын таныш булмаған номерҙан шылтыратыу ала. Шылтыратыусы диспансеризация тураһында һораша башлай һәм СНИЛС номерын әйтеүҙе һорай. Пенсионер мәғлүмәтте бирә, әммә әңгәмәсе СМС-хәбәрҙән код һорағас, ул баш тарта һәм һөйләшеү тамамлай. Бер нисә минуттан һуң яңы шылтыратыу килә. Был юлы шылтыратыусы үҙен Росфинмониторинг хеҙмәткәре тип таныштыра һәм мутлашыусыларҙың пенсионерҙың банк картаһына инеүен белдерә. Ул был карталарҙың һәм сумманың "хәүефһеҙ иҫәптә" булыуын, ә банк ҡушымтаһында һандарҙың бер ниҙән дә шикләнмәҫ өсөн үҙгәртелеүен әйтә. Кредиттарҙы рәсмиләштереүҙе булдырмау өсөн мутлашыусы пенсионерға енәйәтселәр һораған суммаға кредит алырға тәҡдим итә. Пенсионерға аҡсаны картаға күсерергә ҡушалар, уны уға һуңыраҡ килтерәсәктәрен, ә виртуаль версияны шунда уҡ күсереп алырға мөмкин икәнлеген белдерәләр. Пенсионер уларға банк ҡушымтаһын телефонына ҡуя һәм виртуаль картаны авторизациялап, иҫәбенә 170 мең һум аҡса күсерә. Бынан һуң пенсионер ҡатын бер нисә банкка мөрәжәғәт итә, кредит һәм кредит картаһын рәсмиләштерә, 100 мең һумдан ашыу аҡсаны мутлашыусылар иҫәбенә күсерә. Енәйәтселәр уға машинаһын һатырға һәм һатыуҙан килгән аҡсаны махсус иҫәпкә күсерергә кәрәклеген әйтә, яҡын арала машинаны кире ҡайтарырға вәғәҙә итәләр. Пенсионер һатып алыусыны таба, автомобилен һата һәм аҡсаны ошо иҫәпкә ебәрә. Һуңыраҡ, үҙ автомобиленең яҙмышы менән борсолоп, пенсионер машина тураһында һорай. Уға яуап итеп машинаның штраф стоянкала булыуын хәбәр итәләр. Тәүҙә ул тыныслана, әммә телевидениела бындай мутлашыу тураһында сюжет күреп, үҙенең тоҙаҡҡа эләгеүен аңлай.

Мутлашыу билдәләренә иғтибар итһәгеҙ, бындай хәлдәргә тарымаҫһығыҙ. Беренсенән, әгәр шылтыратыу таныш булмаған номерҙан килһә һәм әңгәмәсе шәхси мәғлүмәттәр талап итә икән, һәр ваҡыт хәүефләнергә кәрәк.

Икенсенән, үҙҙәрен белгестәр итеп танытҡан һәм хәүеф һылтауы менән ашығыс эш итеүҙе талап иткән сит кешеләргә ышанырға ярамай. Мутлашыусылар йыш ҡына ҡурҡыу һәм баҫымды ҡулланып, ҡорбанды тиҙ һәм аҡылһыҙ эш итергә мәжбүр итә.

Өсөнсө кәңәш: мәғлүмәтте үҙегеҙ тикшерегеҙ. Әгәр кемдер һеҙҙең иҫәп менән бәйле проблемалар тураһында хәбәр итһә, банкҡа рәсми номер буйынса үҙаллы шылтыратыу йәки хәлдең дөрөҫлөгөн раҫлау өсөн бүлексәгә барыу яҡшыраҡ.

Әгәр һеҙ мутлашыу ҡорбаны булһағыҙ, хоҡуҡ һаҡлау органдарына һәм банктарға мөрәжәғәт итеүҙе оҙаҡҡа һуҙмағыҙ. Был ваҡиға тураһында ни тиклем тиҙерәк хәбәр итһәгеҙ, аҡсағыҙҙы кире ҡайтарыу йәки артабанғы юғалтыуҙарҙы булдырмау мөмкинлеге лә шул тиклем күберәк буласаҡ.