Башҡорт теленән онлайн-олимпиада

9-11октябрҙә Башҡортостанда икенсе йыл рәттән башҡорт теленән онлайн-олимпиада үткәрелә. Олимпиадала ҡатнашыусылар өсөн төрлө ҡатмарлылыҡ кимәлендәге мәсьәләләр буйынса онлайн-тест формаһында заданиелар әҙерләнгән:

Олимпиадала ҡатнашыусылар өсөн төрлө кимәлдәге онлайн-тест һорауҙары әҙерләнгән:

• башланғыс кимәл – башҡорт телен яңы өйрәнә башлағандар өсөн;
• ирекле кимәл – башҡорт телендә иркен аралашҡан ҡатнашыусылар өсөн;
• башҡорт теленең диалекттары – башҡорт теленең диалекттары менән ҡыҙыҡһынған ҡатнашыусылар өсөн.

Тест һорауҙарына яуап биреү өсөн 9 октябрҙән 11 октябргә тиклем basholimpiada.ru сайтына инеп, теркәлергә кәрәк. Артабан өс кимәлдең береһен һайлап, 45 минут эсендә 30 һорауға яуап бирергә генә ҡала. Тест тамамланғас, һәр ҡатнашыусыға йыйылған балдар һаны менән сертификат тапшырыла. 100 балға тиклем йыйыу мөмкинлеге бар.

Олимпиада тамамланғандан һуң сайтта белемде үҙ аллы тикшереү өсөн һорауҙарға дөрөҫ яуаптар урынлаштырыла. Әгәр ҙә теркәлеү, тест үтеү йәки сертификат алыу, техник аспекттар менән бәйле ҡыйынлыҡтар тыуһа, 7(3472) 46-58-24 телефон һандары буйынса мөрәжәғәт итергә мөмкин.

– Башҡорт телен һаҡлау һәм үҫтереү ойошмаһы башҡорт теленең бәҫен арттырыу йүнәлешендә бихисап проекттарҙы тормошҡа ашыра. Башҡорт теленән диктант акцияһы 2019 йылдан халыҡ-ара кимәлгә сыҡты. Башҡорт теленән олимпиаданы икенсе йыл ғына үткәрәбеҙ, әммә ул да халыҡ һөйөүен яулар, яҡшы йолаға, туған телебеҙҙе өйрәнеү проблемаларына иғтибар йәлеп итерҙәй популяр инструментҡа әүерелер тигән өмөттәбеҙ, – тип билдәләне Башҡорт телен һаҡлау һәм үҫтереү фонды директоры Гөлназ Йосопова.

2023 йылдың октябрендә олимпиадала Рәсәйҙең 67 төбәгенән һәм 23 илдән вәкилдәр ҡатнашты. Биш көн дауамында бөтәһе 27 614 кеше белемен тикшерҙе.

Олимпиаданы Башҡорт телен һаҡлау һәм үҫтереү ойошмаһы «Мираҫ» йәштәрҙең башланғыстарына булышлыҡ итеү фонды менән берлектә үткәрә. Проект Башҡортостан Республикаһы Башлығы гранттары фонды булышлығында Башҡортостан Башлығы грантына тормошҡа ашырыла.