Тәртип ихатанан башлана...

 "Башҡорт ихаталары" уникаль программа. Башҡортостан Башлығы Радий Хәбировтың инициативаһы менән 2019 йылда башланғыс алған “Башҡорт ихаталары” программаһы республикала, шул иҫәптә районда уңышлы тормошҡа ашырыла.

 Маҡсаты: урындағы халыҡҡа уңайлы мөхит булдырыу. Балалар өсөн уйын, спорт майҙансыҡтары, яҡтылыҡ, парковка урындары, контейнерҙар, асфальт түшәү – барыһы ла күҙ уңында тотола.

 Өфөлә Шота Руставели, М.Горький, Әхмәтов,Рихард Зорге, Степан Кувыкин, Шмидт, Борисоглебская, Яр буйы, Ҡулса, Черниковка, Октябрь революцияһы урамдарындағы ихата биләмәләре “Башҡорт ихаталары” республика программаһы ярҙамында төҙөкләнде. Заманса балалар һәм спорт майҙансыҡтары, иркен парковкалар, йәйәүлеләр өсөн зона барлыҡҡа килде, видеокүҙәтеү, яҡтыртыу ҡоролмалары, эскәмйәләр ҡуйылды.

Республика Башлығы Радий Хәбиров "Башҡорт ихаталары" программаһының 2025 йылға тиклем оҙайтылыуы тураһында белдерҙе. “Кәрәкле проект, уны оҙайтырға ҡарар иттек. 2025 йылда планда 120 ихата биләмәһен масштаблы реконструкциялау”, - тине Башҡортостан етәксеһе.

Ябай халыҡтың мәнфәғәте өсөн йүнәлтелгән программа республикала уңышлы эшләп килә.
Мәҫәлән,

 Белоретта бер-бер артлы күп фатирлы йорт ихаталарында бөтә уңайлыҡтары булған заманса, күркәм майҙансыҡтар барлыҡҡа килгән.

Салауат ҡалаһында 8 күп фатирлы йортто үҙ эсенә алған һәм 254 парковка урыны, балалар майҙансығы булдырыуҙы күҙ уңында тотҡан “Башҡорт ихаталары” программаһы буйынса ике ҙур проект тормошҡа ашырылған.
Стәрлетамаҡ ҡалаһында – 8, Өфөлә 33, Әбйәлил районының Асҡар ауылында 7, Ауырғазы районының Талбазы ауылында 8 йорттоң ихата алды күркәмләнә.

 Программаның биш йылында 400 мең кеше йәшәгән 1326 ихата төҙөкләндерелде. Быйыл республиканың 30 ҡала-районында 143 ихатаға ремонт эшләнә. Уны тормошҡа ашырыуға финанстың күбеһе республика бюджетынан бүленә. Программа үҙ эсенә балалар һәм спорт майҙансыҡтары төҙөүҙе, йәшелләндереүҙе, парковкаларҙы төҙөкләндереүҙе һәм башҡа эштәрҙе ала. Эш сифаты белгестәр тарафынан контролдә тотола һәм халыҡтың фекерен иҫәпкә ала.

Башҡортостан Республикаһы Башлығы Радий Хәбировтың инициативаһы менән 2019 йылда башланғыс алған “Башҡорт ихаталары” программаһы Баймаҡта яҡшы тормошҡа ашырыла. Ҡалала был тәңгәлдә алып барылған ҙур эштәрҙең һөҙөмтәһен күреп, халыҡ уға ышаныс белдерә. Әленән-әле тәҡдим менән сығалар, үҙҙәре лә һуңғы эш һөҙөмтәһен күреү өсөн төҙөкләндереүҙә әүҙем ҡатнаша. 

2019  йылда ҡаланың Салауат Юлаев проспектының 31-се, 33-сө һәм Юбилей урамының 1-се йорттарҙың ихаталарында тулы реконструкция үтте. Шулай уҡ Салауат Юлаев проспектының 25-се йорт алдына асфальт япмаһы түшәлде, электр яҡтыртҡыстары яңыртылды.   Һуңғы йылдарҙа иһә Әлибаев урамының 53-сө “а”, 57-се һәм Юбилей урамының 3-сө, Әлибаев урамының 49-сы, Юбилей урамының 2-се, 4-се, Тыныслыҡ урамының 17-се, 19-сы, 21-се, 23-сө, Тыныслыҡ урамының 3-сө, 3-сө “а”, 3-сө “б”, Салауат Юлаев проспектының 13-сө, 15-се, 17-се, Муса Йәлил урамының 17-се йорттарында йәшәүселәр оло ҡыуаныс кисерҙе. Уларҙың да ихата алдарында күп мөмкинлектәр тыуҙы: асфальт япмаһы түшәлде, тротуарҙар яңыртылды, балалар һәм спорт майҙансыҡтары ҡалҡып сыҡты, автомобилдәрҙе ҡуйыу урындары барлыҡҡа килде, урамдарҙы яҡтыртыуға электр энергияһы селтәре һуҙылды.

Быйыл Баймаҡта унынсы ихата төҙөкләндерелә. Әйтергә кәрәк, улар йәмғеһе – егерме һигеҙ. Быйыл иһә “Башҡорт ихаталары” программаһы буйынса эштәр Тыныслыҡ урамының 25-се, С.Есенин урамының 1-се, 3-сө, С.Чекмарев урамының 17-се йорттары алдында дауам итә. Бөгөн бында һуңғы төҙөкләндереү эштәре бара.

Быйыл объекттың яртыһы төҙөкләндереләсәк. Бының өсөн республика бюджетынан 15 миллион һум аҡса бүленгән, - тине Баймаҡ ҡала биләмәһе хакимиәте башлығы Радмир Иҫәнбаев. - Ҡалғаны, йәғни алты күп фатирлы йортто үҙ эсенә алған ихата алдындағы эштәр киләһе йылда дауам итәсәк. Быға Чекмарев урамының 34-се, 36-сы, 38-се, 40-сы һәм Есенин урамының 5-се һәм 7-се йорттар ҡарай.

Бөгөн бында һуңғы төҙөкләндереү эштәре бара. 

Программа халыҡ араһында ыңғай баһалана, ул ябай кешеләрҙең мәнфәғәте өсөн йүнәлтелгән.