Табиптар өс йәшлек баланың ғүмере өсөн көрәшә

Башҡортостанда табиптар трактор аҫтына эләккән 3 йәшлек баланың ғүмере өсөн көрәшә. Бәхетһеҙ осраҡ кисә киске сәғәт ундарҙа Йылайыр районының Юлдыбай ауылында теркәлгән. Башҡортостандың баш дәүләт автоинспекторы Владимир Севастьянов хәбәр итеүенсә, урындағы бер кеше, иҫерек килеш, МТЗ-80 тракторы руле артында өс йәшлек баланы тапаған.

"Билдәле булыуынса, малай урамда өлкән апаһы менән уйнаған. Бала ауыр йәрәхәттәр ала. Әлеге ваҡытта уның ғүмере өсөн табиптар көрәшә. Документтарҙы тикшереү 55 йәшлек ирҙең трактор менән идара итеү хоҡуғына эйә булмауын, транспорт сараһының билдәләнгән тәртиптә һәм бер ниндәй документһыҙ теркәлмәүен күрһәтте»,-тип яҙҙы ул үҙенең социаль селтәрҙәрендә.