Бәшмәккә барып һәләк булған

Өфөлә төндә ҡотҡарыусылар һәм ирекмәндәр юғалған 72 йәшлек бәшмәксене эҙләп сыҡты. Берҙәм диспетчер хеҙмәтенә пенсионерҙың Максимовка районында бәшмәк йыйырға китеүе һәм өйөнә ҡайтмауы тураһында хәбәр килә. Урынға Өфөнөң граждандарҙы яҡлау идаралығы, ҡотҡарыусылар, «БашРегионСпас» һәм «ЛизаАлерт» ирекмәндәре сыҡты. Улар төркөмдәргә бүленеп эш итә. Ҡотҡарыусылар иң алыҫ квадратты үҙ өҫтөнә ала һәм уны квадроциклда тикшерә. Эҙләүҙәр туҡтауһыҙ ямғыр аҫтында үтә һәм бер нисә сәғәт дауам итә. Юғалған кешене туғандары юлдан 1,5 километр алыҫлыҡта таба, әммә, ҡыҙғанысҡа ҡаршы, үлгән була.

Урманға сыҡҡанда һаҡ булығыҙ!  Алыҫҡа китмәгеҙ, телефонығыҙҙың зарядкаһы тулы булһын, яңғыҙ йөрөмәҫкә тырышығыҙ.