Республика табиптарына

Башҡортостанда быйыл 129 һаулыҡ һаҡлау хеҙмәткәре дөйөм 144,5 миллион һумлыҡ ярҙам аласаҡ. Башҡортостандың Һаулыҡ һаҡлау министрлығының матбуғат хеҙмәтенән хәбәр итеүҙәренсә, республикала «Ауыл табибы» һәм «Ауыл фельдшеры» программалары тормошҡа уңышлы ашырыла. Быйыл түләүҙәрҙе 33 табип һәм 46 фельдшер аласаҡ.

Башҡортостан Башлығы Радий Хәбировтың һаулыҡ һаҡлау өлкәһендә кадрҙар мәсьәләләренә айырым иғтибар бүлә. Республика ил кимәлендә медицина хеҙмәткәрҙәренә булдырылған ярҙам саралары буйынса алдынғылар иҫәбендә. Шулай итеп, Радий Фәрит улының ҡушыуы буйынса ҙур булмаған медицина учреждениеларында эшкә урынлашҡан терапевтар, педиатрҙар, дөйөм практика табиптары түләүҙәргә иҫәп тота ала.

– Бәләкәй медицина ойошмалары өсөн табиптар» программаһын былтыр башланыҡ, уның маҡсаты – ауыл ерендә медицина ярҙамы сифатын күтәреү. Был программа буйынса һаулыҡ һаҡлау хеҙмәткәрҙәре яҡшы льготаларға иҫәп тота ала. 25 меңдән аҙыраҡ кеше беркетелгән медицина учреждениелары белгестәре өс йыл дауамында йылына 1 миллион һум аҡса ала, – тине Радий Хәбиров.

Бынан тыш, медицина ойошмалары һәм муниципалитеттар хеҙмәткәрҙәргә ярҙам күрһәтә:

• йәш белгестәргә дәртләндереү премиялары;
• торлаҡ менән тәьмин итеү (торлаҡ, социаль найм, дөйөм ятаҡ, ҡуртым);
• торлаҡ төҙөлөшө өсөн бушлай ер биреү;
• торлаҡ-коммуналь хеҙмәттәр өсөн сығымдарҙы компенсациялау;
• балалар баҡсаларында урындар бүлеүгә булышлыҡ итеү.