Һәр саҡ Ватан һағындағы

Батырҙар һүҙе

Ҡыр батырға ни кәрәк?

Ҡыҙ батырға ни кәрәк?

Күк батырға ни кәрәк?

Моң батырға ни кәрәк?

Һыу батыр һуң ни һорай?

Урман батыр ни юрай:

— Һәммәбеҙҙең — барыһыны

Теләгәне — тыныслыҡ,

Юрағаны — тыныслыҡ,

Уйлағаны — тыныслыҡ,

Һөйләгәне — тыныслыҡ.

Уттың һуңы көл булыр,

Көлдөң һуңы ел булыр,

Көлдә йәшәү — толҡа юҡ,

Елдә иман — тотҡа юҡ.

Еребеҙ көлгә ҡалмаһын,

Көнөбөҙ елгә ҡалмаһын.

Еребеҙҙе арсалап,

Һыуыбыҙҙы ҡурсалап,

Йәребеҙҙе һаҡларға,

Йәнебеҙҙе аҡларға

Беҙ, батырҙар, баҫабыҙ

Именлектең һағына,

Тыныслыҡтың сафына.

Теләгебеҙ — тыныслыҡ,

Тынысһыҙ тибә йөрәк.

Тыныслап йәшәр өсөн,

Ерҙә тыныслыҡ кәрәк.

Рәмзилә Хисаметдинова

2009 "Моңдоң йәне — мөхәббәт" исемле китаптан.