«Тамыр» телеканалы Мәскәүҙәге яҡташтарҙы концерт ҡуйып һөйөндөрҙө

Мәскәүлеләр йәш йондоҙсоҡтарҙы ҡолас йәйеп ҡаршы алды. Һәр сығышты дәррәү алҡыштарға күмделәр. Тамашасылар йәш әртистәргә ҡушылып йырларға тырышты. Бәләкәстәр был кисте рәхәтләнеп бейенеләр, шаярҙылар, төрлө-төрлө уйындар уйнанылар. 

Балаларҙы "Бөтә Донъя башҡорттары Ҡоролтайы" йәмәғәт ойошмаларының халыҡ-ара берлеге Президиумы рәйесе, Рәсәй Федерацияһы Дәүләт Думаһы депутаты Эльвира Айытҡолова, Башҡортостан Республикаһының Рәсәй Федерацияһы Президенты ҡарамағындағы Тулы хоҡуҡлы вәкиле вазифаһын башҡарыусы Ришат Халиҡов, Башҡортостан Республикаһының Дәүләт власы органдары эшмәкәрлеген тәьмин итеү буйынса Мәскәү ҡалаһындағы Аппарат етәксеһе Ринат Фәйзуллин, Мәскәүҙәге Бөтә донъя башҡорттары ҡоролтайының беренсе урынбаҫары Альфред Вәлиев тәбрикләне. 

Концертҡа инеү Мәскәү сувенирҙары менән мөмкин ине. Мәскәү башҡорттары тиҙ арала бүләктәр ҡалдыра торған өҫтәлде күстәнәстәр һәм уйынсыҡтар менән тултырҙы. Тамырҙар бүләктәрҙе "Иамыр" студияһында шөғөлләнгән башҡа балаларға ла өләшергә һүҙ бирҙе. 

"Беҙ Мәскәүҙә" Тамыр "ҙың концертын йышыраҡ күрергә теләйбеҙ, киләһе осрашыуҙы көтөп ҡалабыҙ", - тип БР-ҙың РФ Президенты ҡарамағындағы Тулы хоҡуҡлы вәкиле вазифаһын башҡарыусы Ришат Халиҡов саҡырып ҡалды.

"Мин дә "Тамыр" студияһына йөрөргә теләр инем. Тик үкенескә Мәскәүҙә бындай студия юҡ. Шуға ла бөгөн йәш артистарға күп итеп күстәнәстәр тотоп килдем", - тип үҙ фекерен белдерҙе йәш тамашасыларҙың береһе булған Алтынай Вәхитова. 

"Мәскәүҙәге балаларҙың ата-әсәләре күптән "Тамыр" телеканалын концерт менән көтә инде. Быйыл ниһайәт юл төштө. Башҡортостандың Тулы хоҡуҡлы вәкиллеге ярҙамында Мәскәү үҙәгендә балалыҡтың матур бер байрамын үткәрҙек. Башҡортостандан алыҫта йәшәп тә балаларында башҡорт мәҙәниәтенә һөйөү тәрбиәләй, балаларын туған телдә һөйләштергән ата-әсәләргә ҙур рәхмәт. Илебеҙҙең баш ҡалаһына булған был музыкаль сәйәхәт тамырҙарҙың хәтерендә мәңге һаҡланыр", - тип тәьҫораттары менән уртаҡлашты "Тамыр" телеканалы директоры Гөлназ Ҡолһарина.