Шәкәр барыһына ла етә!

Ленин урамындағы күмәртәләп һатыу магазинында торам. Шәкәр юҡ. Һатыусынан: "Шәкәр юҡмы ни?" тип һорайым. "Бар, әлегә һатыуға сығармайбыҙ"-ти был иҫе лә китмәй. Яһалма дефицит тыуҙырып, хаҡтарҙы арттырып һатыу шул була инде. Ә бит республикала шәкәргә ҡытлыҡ юҡ. Беҙҙең шәкәргә әжәл дарыуындай ташланыуыбыҙ, үҙебеҙҙе ярыҡ кәмәгә ултырта...

Шәкәр барыһына ла етә. Татлы ризыҡ тирәләй барлыҡҡа килгән ажиотаж урынһыҙ. Заводтарҙа етәрлек күләмдә шәкәр ҡомо һаҡлана. Башҡортостандың ауыл хужалығы министры Илшат Фәзрәхманов республика халҡын юҡҡа ығы-зығы ҡуптармаҫҡа өндәй. Әле шәкәргә һорау еләк-емеш өлгөргән мәлдәргә ҡарағанда ла ике тапҡырға күберәк. Башҡортостандағы ике заводтан көнөнә генә 350-400 тонна шәкәр ҡомо оҙатыла. Белгестәр, халыҡ аҙыҡты күпләп һатып алыуҙан туҡтау менән артҡан хаҡтар ҙа төшә башлаясаҡ, ти.

Үҙебеҙгә - үҙебеҙ зыян эшләйбеҙ түгелме күпләп һатып алып?

Гүзәл Иҫәнгилдина.