Йәрминкәлә хаҡтар үҙгәрмәне

Ауыл хужалығы йәрминкәһен баймаҡтар һәр саҡ көтөп ала һәм үҙҙәренә кәрәкле сифатлы ризыҡ-тауарҙы һатып ала.Район хакимиәте башлығының ауыл хужалығы буйынса беренсе урынбаҫары Азат Шәриповтың тәҡдиме менән йәрминкәләр хәҙер һәр аҙнаның шәмбеһендә үткәрелә.

Бөгөн йәрминкәлә шәхси хужалыҡтар һәм эшҡыуарҙар ит (килограмы 350-450 һум), балыҡ (100-400 һум), картуф (биҙрәһе 350 һум), һөт ризыҡтары тәҡдим итте.Баймаҡтан эшҡыуар Л.Мастерованың ветаптекаһы үҙенең тауарҙарын сығарҙы.Әлбиттә, аҙыҡ-түлек ҙур һорау менән файҙаланды, айырыуса итте күпләп һатып алдылар.

Ярылған утын, рулонлы бесән дә алырға мөмкин ине.Һуңғыһын Ғафури районынан алып килгәндәр, бер рулоны - 3 мең һум.

Баҙарға сығып, кемгәлер аҡса түләгәнсе, йәрминкәлә буш урын алып сауҙа итеү күпкә отошлораҡ, әлбиттә.Көндәр йылыныу менән сауҙа итеүселәр ҙә, һатып алыусылар ҙа бермә-бер артасаҡ.Сөнки халыҡҡа шикле сит ил продукцияһы түгел, ә сифатлы үҙебеҙҙең аҙыҡ-түлек кәрәк.