Депутаттар өмәгә сыҡты

Баймаҡтың ҡала биләмәһе депутаттары бөгөн өмәгә сығып, Таналыҡ ярының бер өлөшөн таҙартты! Афарин!

Бөгөн ҡала биләмәһе депутаттары өмәгә сыҡты. 8-9 депутат Завод биҫтәһендәге обелиск янында йыйылышып, Таналыҡ ярын йыйыштыра ла башланы. Ҡулдарындағы ҙур-ҙур тоҡтарҙы һә, тигәнсе тултырып та ҡуйҙылар.

- ...Ситтән ҡарағанда таҙа кеүек күренгән яр буйында был тиклем дә күп ҡый өйөлөп ята, тип әйтмәҫһең дә!

- ...Ана, тегендә асарбаҡтар үҙҙәренә төнлөк эшләп алғандар!...

таналыҡ буйына йыйылған депутаттар үҙ-ара көлөшәләр ине.

- Беҙ башҡаларға өлгө булһын тип тап бөгөн өмәгә сығырға ҡарар иттек. Ҡый күп, тулып ята. Бәлки башҡалар ҙа беҙҙең идеяны күтәреп алыр, Таналыҡ буйын таҙартырға өмәгә сығыр, - тинеләр улар бер һүҙҙән.

Күптәр: "Экология насарая, тәбиғәт бысрана", - тип оран һалырға ярата. Ә ошолай шым ғына йыйылышып сығып, тәбиғәтте сүп-сарҙан таҙартырға беҙгә кем ҡамасаулай!