"Йәшә һәм Хәтерлә"

Бөйөк Еңеү көнө алдынан Ҡоролтай эргәһендәге Рәсәй Геройы Миңлеғәле Шайморатов исемендәге мобиль ирекмәндәр отряды «Йәшә һәм хәтерлә» исемле автоуҙыш иғлан иткәйне.

Акцияның маҡсаты – Чечен, Афған һәм башҡа ҡыҙыу нөктәләрҙә һәләк булған һалдаттарҙың ата-әсәләренә, яҡындарына ярҙам күрһәтеү булды. Автоуҙыш тулыһынса маҡсатына иреште.

Ирекмәндәр 6-7 майҙа отряды үҙ автомобилдәрендә Ғафури - Ауырғазы - Иглин - Мәләүез - Стәрлебаш - Нуриман - Баймаҡ - Хәйбулла - Күгәрсен райондары, шулай уҡ Өфө - Күмертау - Салауат - Стәрлетамак ҡалалары буйлап үтеп, аҙыҡ-түлек йыйынтыҡтарын таратты.

“Ярҙам алыусылар беҙҙе күҙ йәштәре менән ҡаршыланы. Ярҙам алыуҙан да түгел, ә улдарын онотмауҙары, уларҙы әле лә иҫләүҙәре өсөн түгелгән шатлыҡ йәштәре ине. Отряд исеменән район - ҡалаларҙың ветерандар советтарына һәм Башҡорттар ҡоролтайы етәкселәренә оло рәхмәтебеҙҙе белдерәбеҙ», - ти Рәсәй Геройы Миңлеғәле Шайморатов исемендәге мобиль ирекмәндәр отряды етәксеһе Тимерйән Рәжәпов.