Исаев: Бөгөн Дәүләт Думаһы әсәлек капиталын киңәйтеү буйынса төҙәтмәләрҙе ҡараясаҡ

РФ Президенты Владимир Путин тәҡдим иткәнсә, 18 февралдәге ултырышта Дәүләт Думаһы әсәлек капиталын киңәйтеү буйынса булған төҙәтмәләрҙе икенсе уҡыуҙа ҡараясаҡ. Был турала "Берҙәм Рәсәй" фирҡәһенең етәксеһе урынбаҫары Андрей Исаев хәбәр итте.

Исаев әйтеүенсә, закон проекты ошо уҡ аҙнала үтәсәк һуңғы өсөнсө уҡыуҙа уҡ ҡабул ителәсәк. Һәм 26 февралдә уны Федерация Советында ҡаралып, ҡултамға ҡуйыу өсөн Президентҡа йүнәлтелә. "Шулай итеп беҙ уны ҡабул итеү процедураһын тиҙләттек", - тип ул аңлатты.

Төҙәтмәләр тәү сиратта уның ваҡытын 2026 йылдың 31 декабренә тиклем оҙайтты. Әсәлек капиталы тәүге бала тапҡан йә иһә уллыҡҡа алған ғаиләләргә 2020 йылдың 1 ғинуарынан уҡ түләнә башлаясаҡ. Улар 466 мең 617 һум аласаҡ. Ғаиләлә икенсе һәм унан һуңғы тыуған балалар өсөн алынасаҡ аҡсаның күләме 616 мең 617 һум тәшкил итә. Әсәлек капиталын юллау ваҡыты ла (сертификат алыу) 15 көндән 5 көнгә тиклем ҡыҫҡартыла. Сертификат буйынса аҡса алыу ваҡыты ла 1 айҙан 10 көнгә тиклем ҡыҫҡартыласаҡ.

Хәтерегеҙгә төшөрәбеҙ: балалы ғаиләләргә әсәлек капиталы формаһында Дәүләттән ярҙам алыу программаһы 2007 йылдан эшләп килә. 2016 йылға тиклем әсәлек капиталы инфляция күләмендә йыл һайын индексацияланып килде. Унан һуң индексация туҡтатылып, 2020 йылда яңынан тергеҙелде.