Думаға әсәлек капиталын киңәйтеү тураһында төҙәтмә индерелде

Дәүләт Думаһының ғаилә, ҡатын-ҡыҙҙар һәм балалар буйынса профилле комитетына дүшәмбе көн РФ Президенты Владимир Путиндың әсәлек капиталын киңәйтеү буйынса тәҡдиме еткерелде. Был турала ТАСС-а комитет рәйесе Тамара Плетнева хәбәр итте. Дәүләт башлығы Федераль йыйылышҡа ҡарата булған мөрәжәғәтнамәһендә әсәлек капиталын кәм тигәндә 2026 йылға тиклем оҙайтырға һәм уны ғаиләләге тәүге балаға ла түләргә, шул уҡ ваҡытта ике балалы ғаиләләр өсөн уның суммаһын арттырырға тигән тәҡдим индергәйне.

"Төҙәтмәләр ҡабул ителде, уны ашырыу буйынса эштәр алып барылаП", - тине Плетнева. Һәм ул 19 февралдә булған ултырышта тикшереләсәк, тип билдәләп үтте. "Тәҡдим ителгән төҙәтмәләрҙең барыһы ла тиерлек индерелде", - тип өҫтәне. Әйткәндәй төҙәтмәләрҙең авторҙары булып депутаттар, шул иҫәптән Плетнева сығыш яһаны. Төҙәтмәлә әсәлек капиталын баҡса биләмәһендә йорт һалыу йүнәлеше лә бар.