Башҡортостан Дәүләт Йыйылышы 31 декабрҙе ял көнө итеү башланғысын хупламай

Дәүләт Йыйылышы рәйесе Константин Толкачев парламенттың рәсми позицияһын әйтте. Республикала байрам көндәре исемлеген киңәйтеү төбәк иҡтисадында кире сағылыш табыуы ихтимал, тип иҫәпләй ул.

«Башҡортостанда федераль кимәлдә нығытылғандарҙан тыш, өҫтәмә өс ял көнө билдәләнә: Республика көнө, Ураҙа байрамы һәм Ҡорбан ғәйете. Ял көндәренең береһен 31 декабргә күсереүгә килгәндә, был идеяның йәшәүгә хоҡуғы бар, ләкин ул башҡарма власть органдары ҡарамағында», — тине Константин Толкачев.