Башҡортостанға милли проект буйынса алты күсмә ФАП бүлеп бирелде

Тәүге тапҡыр Башҡортостандың алты районы күсмә фельдшер-акушерлыҡ пункты менән йыһазландырылды. Бындай ФАП-тар аҙ халыҡ йәшәгән ауылдарҙы хеҙмәтләндерәсәк. Был турала РФ Һаулыҡ һаҡлау Министрлығы хәбәр итте.

"Республикаға бирелгән был мобиль ФАП-тар "ПАЗ" автобусы базаһында эшләнгән. Улар электрокардиограф, кардиомаркер өсөн кәрәкле портатив экспресс-анализатор, дефибриллятор-монитор, гинекологик кресло, аналих алыу һәм башҡа медицина ҡоролмалары менән йыһазландырылған", – тип яҙылған унда.

Әйткәндәй, ФАП-тарҙы рәсмиләштереү буйынса эштәр тамамланған. Тиҙҙән улар республиканың Баймаҡ, Белорет, Әбйәлил, Бөрйән, Ейәнсура һәм Йыларйыр райондарында үҙҙәренең тәүге пациенттарын ҡабул итә башлаясаҡ.

Ҡоролма "Һаулыҡ һаҡлау" милли проекты сиктәрендә һатып алынған. Республикаға йыл тамамланғансым йәнә 15 ошондай ФАП бүленеүе көтөлә.

Сығанаҡ: https://futurerussia.gov.ru