Подъездарға иғтибар арта

Республикала күп ҡатлы йорттарҙың 26 мең подъезы төҙөкләндереләсәк. Был хаҡта Башҡортостан Республикаһы Башлығы вазифаһын ваҡытлыса башҡарыусы Радий Хәбиров белдерҙе. Яңы республика программаһы 6 йылға (2019-2024 йылдарҙа) иҫәпләнгән.

Радий Фәрит улы белдереүенсә, подъездарҙы төҙөкләндереү барышында тәҙрәләрҙе һәм ишектәрҙе алмаштырыу, почта йәшниктәрен яңыртыу, беренсе ҡаттағы иҙәнгә плитә түшәү, стеналарҙы буяу, электр сымдарын кабель каналы менән көпләү, энергияны һаҡлаусы лампалар ҡуйыу күҙаллана. Шул уҡ ваҡытта эште, халыҡҡа уңайһыҙлыҡ тыуҙырмайынса, йылдам башҡарыу бурысы йөкмәтелә.

Атап үтелгән программа буйынса ҡалала һәм районда күп ҡатлы йорттарҙың 302 подъезын ремонтлау күҙаллана.