Яҡташыбыҙ, мәшһүр ҡурайсыларҙың береһе, педагог, Башҡортостан Республикаһының атҡаҙанған мәҙәниәт хеҙмәткәре Әҙеһәм Исҡужиндың тыуыуына 90 йыл тулыу айҡанлы 27 февралдә Темәс мәҙәниәт йортонда уның Хәтер кисәһе үтә. Сарала арҙаҡлы яҡташтарыбыҙ Юлай Ғәйнетдинов, Иҙел Аралбаев һәм виртуоз ҡурайсы Роберт Юлдашев ҡатнаша. Кисә сәғәт киске 7-лә башлана. Бөгөн киске сәғәт 5-тә БСТ каналында Әҙеһәм Исҡужин тураһында тапшырыу күрһәтеләсәк.

С.Юлаев исемендәге мәҙәниәт һәм ял паркында йәштәр өсөн Ғашиҡтар көнөнә арналған байрам ойошторолдо. Унда 3-сө мәктәп уҡыусылары флешмоб күрһәтте. Изге йолаға әүерелгән йөрәк формаһындағы шарҙарға ут ҡабыҙып, теләктәр теләй-теләй һауаға осороу акцияһы быйыл да иң серле мәл булды. Был һауа шарҙарын һатыуҙан килгән аҡса Урғаҙа ауылында йәшәүсе Әлиә Ҡолмөхәмәтова исемле инвалид баланың сәләмәтлеген нығытыуға йүнәлтеләсәк.

Күсей мәктәбендә Ғаилә йылына арналған “Атай, әсәй һәм мин – спорт ғаиләһе” сараһы үтте. Ҡатнашыусыларҙы мәктәп директоры Ҡ.Ш. Уйылданов тәбрикләне. Ярышты физкультура уҡытыусыһы Ә.Ш. Фәйзуллин сәмле итеп алып барҙы. Биш команда араһынан Дилбәр һәм Хәмзә Сәфәрғәлиндарҙың ғаиләһе еңеү яуланы. Афарин!

Мерәҫ ауылы китапханасыһы Дилбәр Яхина мәктәп уҡыусылары менән “Шанлы Афған тауҙары” исемле әҙәби кисә үткәрҙе. Сара барышында Алыҫ Көнсығышта барған яуҙа ҡатнашҡан совет һалдаттары, уларҙың ҡаһарманлыҡтары тураһында бәйән ителде. Яугирҙәргә бағышланған шиғырҙар, йырҙар башҡарылды.