Участка һайлау комиссиялары эш башланы

Рәсәй Президентын һайлау быйыл илебеҙҙәге иң мөһим сәйәси ваҡиға булып тора. Территориаль һайлау комиссияһы участка һайлау комиссияларының составын асыҡлау буйынса эште тамамланы һәм 15 февралдән районда 80 участка һайлау комиссияһы эш башланы. Уларҙың 46-һында үҙгәреш булды. Хәл иткес тауыш биреү хоҡуғына эйә булған 83 участка һайлау комиссияһы ағзаһы төрлө сәбәптәр арҡаһында ваҡытынан алда вәкәләтен һалды. Төп сәбәптәр – йәшәү урынын алмаштырыу һәм вахта ысулы менән эшкә китеү.

Комиссиялар биш йылға булдырыла һәм 2018 йылдың мартында уларҙың эш ваҡыты сыға. Комиссияларҙы булдырыу ваҡыты һайлау кампанияһы осорона тура килһә, яңы состав һайлау үтеп, уның һөҙөмтәләре рәсми иғлан ителгәндән һуң ғына формалаштырыла башлай. Шуға күрә Рәсәй Президентын һайлауҙы ошоғаса эшләгән комиссия составы үткәрә һәм уларҙың эш осоро 28 июнгә тиклем оҙайтыла.

Ғәмәлдәге закондарға ярашлы, һайлаусы теркәлгән урыны буйынса һайлауға бара алмаһа, бөгөн территориаль һайлау комиссияһына, күп функциялы үҙәктә (МФЦ), дәүләт хеҙмәте порталында үҙен теге йәки был һайлау участкаһының исемлегенә индереүҙәрен һорап ғариза яҙа ала. 25 февралдән 12 мартҡа тиклем бындай ғаризаны һәр участка һайлау комиссияһында яҙырға мөмкин.

Президент һайлауы һәр кем өсөн ҙур әһәмиәткә эйә. Шуға күрә был кампанияға һәр гражданин етди ҡарарға, ә һайлау комиссиялары уны ойоштороу һәм үткәреүҙә ҙур яуаплылыҡ тойорға тейеш.