Район хакимиәт башлығы ауылдар халҡы менән осрашты

"Сыңғыҙ ауылы клубында район хакимиәте башлығы Иҙрисов Азамат Сәфәрғәле улы халыҡ менән осрашыу үткәрҙе. Ябай, халыҡсан, күҙгә-күҙ ҡарашып, мәсьәләләрҙе уртаға һалып һөйләшеү, ҡара-ҡаршы ултырып аралашыу ҡатнашыусыларға бик оҡшаны. Азамат Сәфәрғәле улы ауылдың төҙөк, таҙа булыуын телгә алып, бында эшсән, берҙәм халыҡ йәшәйҙер тип уйлайым тип, һоҡланыуын белдерҙе.
Ауылдың глобаль проблемалары менән ир-егеттәр ҡоро исеменән Усманов Нур Мортаза улы сығыш яһаны. Ҡайһы бер проблема осрашыу барышында уҡ хәл ителде.
Йыйылышҡа килгән һәр кем үҙен борсоған һорауҙарға ыңғай яуап алды, шәхси һорауҙары менән дә мөрәжәғәт итеүселәр ҙә булды.
Киләсәктә лә ошондай осрашыуҙар мотлаҡ буласаҡ, тип вәғәҙә биреп хушлашты Азамат Сәфәрғәле улы", - тип хәбәр итә ауыл китапхангасыһы Зәлиә Уразбаева.