+21 °С
Облачно
Мәғариф
5 Мая , 05:15
Еңеү - "Алға, Баймаҡ!" командаһында!
Баймаҡта «Зарница 2.0.» Бөтә Рәсәй хәрби-патриотик уйынының зона этабы үтте. Студенттар ҡатнашлығындағы ярыш Зекериә Аҡназаров исемендәге Урал аръяғы агросәнәғәт колледжында ойошторолдо. Ярышта урта һөнәри белем биреү йорттарынан алты команда: Ейәнсура агросәнәғәт, Белорет металлургия, Белорет күп профилле, Урал аръяғы агросәнәғәт, Урал аръяғы агроинженерия, Учалы тау сәнәғәт колледждары студенттары ҡатнашты. Сараның рәсми өлөшө Урал аръяғы агросәнәғәт колледжы директоры Илдус Зәйнуллиндың сығышы менән башланды. Ул ҡырҙан килгән бәйгеселәрҙе һәм уларҙың етәкселәрен сәләмләп, Баймаҡ ерендә күреүенә шат булыуын белдерҙе, ҡатнашыусыларға уйындарҙа уңыштар теләне. Сараның махсус ҡунаҡтары - район хакимиәте башлығының ауыл хужалығы буйынса беренсе урынбаҫары Азат Шәрипов, Баймаҡ ҡалаһы, Баймаҡ һәм Йылайыр райондарының хәрби комиссары Хөрмәт Хәмитов, «Хәрби туғанлыҡ» ойошмаһы етәксеһе Рәмис Әмиров, махсус хәрби операция ветераны, «Хәрби хәрәкәттә ҡатнашыусыларға һәм ветерандарға ярҙам күрһәтеү» үҙәге директоры Ринат Сабаев, ДОСААФ бүлексәһе уҡытыусыһы Рәшит Бәхтиев, махсус хәрби операция яугире, ошо уҡыу йортон тамамлаусы Владик Мостафин да рухлы егеттәр һәм ҡыҙҙарға изге теләктәрен еткерҙе...
Уйындар уҡыу йортоноң бер нисә майҙансығында барҙы. Бәйге ике өлөштән торҙо. Тәүгеһендә отрядтар хәрбиләштерелгән эстафета, стройҙағы командаларҙы дөрөҫ үтәү оҫталыҡтарын күрһәтеү, атыу әҙерлеге, радиация, химик һәм биологик матдәләрҙән һаҡланыу,килеп сыҡҡан ҡатмарлы шарттарҙа бирешмәү, тактик медицина, сыҙамлыҡ буйынса һынауҙар үтте. Егеттәр һәм ҡыҙҙарҙың стройҙа үҙҙәрен дөрөҫ тотоуҙары, Тыуған ил тураһындағы рухлы йырҙары ҡунаҡтарҙа һоҡланыу уятты. Ярыштың һәр төрө мауыҡтырғыс һәм сәмле барҙы. Командаларҙың яҡшы әҙерлек менән килеүҙәре күренеп тора ине. Икенсе өлөштә отрядтағы егеттәр һәм ҡыҙҙар үҙҙәрен хәрбиҙәр, командирҙар, штурмлаусылар, БПЛА операторҙары, элемтәселәр, медиктар, саперҙар ролендә һынаны. Был ярыштар аша улар үрҙә һаналған һөнәр эшенең нескәлектәре тураһында тағы ла күберәк белде.
Уйын һөҙөмтәләренә килгәндә, Урал аръяғы агросәнәғәт колледжының «Алға, Баймаҡ» командаһы беренсе урынды яуланы. Егеттәрҙе бәйгегә «Тормош хәүефһеҙлеге нигеҙҙәре һәм Ватанды һаҡлау» дәресе уҡытыусыһы Инйәр Биктимеров әҙерләгән. Икенсе урынға Урал аръяғы агроинженерия колледжының «Юлдыбай» отряды лайыҡ булды(етәкселәре - директорҙың тәрбиәүи эштәре буйынса кәңәшсеһе Нәзирә Биксаева). Ейәнсураның «Штурм» командаһы (етәкселәре - директорҙың тәрбиәүи эштәр буйынса кәңәшсеһе Рәсилә Кузяшева) өсөнсө урын яуланы. Сарала ҡатнашыусылар күңелле һәм мауыҡтырғыс уйынды үткәреүсе «Беренселәр хәрәкәте» ойошмаһына, райондың мәғариф бүлегенә, Урал аръяғы агросәнәғәт колледжына һәм тәмле аш-һыуҙары менән һыйлаусы ашнаҡсыларға рәхмәт һүҙҙәрен еткерҙе.
«Алға, Баймаҡ» командаһы баш ҡалала үтәсәк «Зарница 2.0» төбәк-ара конкурсында төбәк данын яҡлап сығыш яһаясаҡ.
Альбина БАЙЕГЕТОВА.
Редакция һайлауы
