Йәмғиәтте өйрәнеү фәне 6-8-се кластар программаһынан алына

Башҡортостан мәктәптәрендә 6-8-се кластар өсөн йәмғиәтте өйрәнеү дәрестәре туҡтатыла. Был хаҡтағы ҡарар федераль кимәлдә ҡабул ителгән.

«Ысынлап та, әйткәнебеҙсә, киләһе йылдан йәмғиәтте өйрәнеү фәне 9-сы кластан уҡытыла башлай, ә ҡалған ваҡыт илебеҙ тарихын өйрәнеүгә бүленә», — тине Рәсәйҙең мәғариф министры Сергей Кравцов ил Хөкүмәтендә 2024-2025 уҡыу йылы йомғаҡтарына арналған брифингта.

Министр әйтеүенсә, дәүләт дәреслектәрен әҙерләү башланған, 5-9-сы кластар өсөн тарих буйынса берҙәм дәреслектәр, шулай уҡ 9-11-се кластар өсөн йәмғиәтте өйрәнеү дәреслектәре өҫтөндә эш тамамланған.

Йәмғиәтте өйрәнеү фәне 2026 йылдың 1 сентябренә тиклем 8-се класс программаларында ҡала. Мәғариф министрлығының бойороғо хоҡуҡи мәғлүмәт порталында баҫылған.