Мәктәптәрҙең әҙерлеге тикшерелде

Яңы уҡыу йылы башланыуға һанаулы ғына ваҡыт ҡалды. Мәктәптәр уҡыусыларҙы ҡабул итергә әҙерме? Әллә төҙәтәһе, эшләйһе эштәр бармы?

Ошо һорауҙарҙы асыҡлау маҡсатында 26 июлдән 2 авгусҡа тиклемге осорҙа ведомство-ара комиссия мәғариф учреждениеларын, йәғни 58 мәктәптең һәм 10 балалар баҡсаһының яңы уҡыу йылына әҙерлеген тикшерҙе. Комиссия составына мәғариф бүлеге белгестәре, полиция хеҙмәткәрҙәре һәм шулай уҡ йәмәғәт палатаһы ағзалары ла йәлеп ителде. 

Һәр ерҙә тәү сиратта хәүефһеҙлек саралары ҡаралды. Шулай уҡ санитар нормалар үтәлеше, белем усаҡтарының кадрҙар менән тәьмин ителеше һ.б. иғтибар үҙәгендә тотолдо. Эш йомғаҡтары буйынса комиссия ағзалары мәктәптәрҙең һәм балалар баҡсаларының яңы уҡыу йылына яҡшы әҙерлеген  билдәләне. Асыҡланған ҡайһы бер етешһеҙлектәрҙе 20 авгусҡа тиклем бөтөрөргә кәңәш ителде. 

Район мәғариф хеҙмәткәрҙәренең август кәңәшмәһендә белем биреү учреждениеларының яңы уҡыу йылына әҙерлегенә йомғаҡ яһаласаҡ. 

Ишбулды СИРАЖЕТДИНОВ,
мәғариф бүлегенең баш белгесе.