"Тамашасы һөйөүе" номинацияһы - Таулыҡай егетендә!

"7 егет" проекты 6-сы миҙгелен япты. Унда Башҡортостандың төрлө районынан иң отҡор, иң теүәккәл ете егет үҙен һынап ҡараны. Беренселек өсөн ярыш бик сәмле барҙы. Егеттәр бесән дә сапты, атта ла һыбай йөрөнө, ҡайыштан төрлө нәмәләр үрҙе, ҡыҫҡаһы төрлө яҡтан үҙ һәләттәрен күрһәтте. Күптәрегеҙ был проектты зәңгәр экрандар аша күҙәтеп тә барғандыр. Бәйгелә Баймаҡ районынан ике егет ҡатнашты һәм һынатманы. Таһир ауылынан Флорид Әлибаев еңеүсе булып, төп приз- башҡорт тоҡомло атҡа эйә булһа, Таулыҡай ауылынан Илназ Исхаҡов - "Тамашасы һөйөүе" номинацияһы еңеүсеһе булды. Уның өсөн 10 меңдән ашыу үҙ тауышын бирҙе. "Тамашасы һөйөүе номинацияһында еңеүемә шатмын. Тауыш йыйыу бик көсөргәнешле барҙы. Минең өсөн үҙ тауышын биргән ғаиләмә, класташтарыма, ауылдаштарыма, туғандарыма, яҡындарыма, яҡташтарыма ҙур рәхмәт. Был беҙҙең уртаҡ еңеү. "7 егет" проекты миңә яңы танышыуҙар, яңы дуҫтар бүләк итте. Ҡыҙыҡлы ла, фәһемле лә бәйгене ойоштороусыларға, беҙгә оҫталыҡ дәресе күрһәткән оҫталарға ҙур рәхмәт!", - тип үҙ тәьҫораттары менән дә уртаҡлашты Илназ.