Баймаҡта бейеү студияһы асылды

Бейеү студияһы Башҡортостан Башлығы гранттары фонды иҫәбенә булдырылған. Проекттың презентацияһы район мәғариф Бүлегенең тамаша залында үтте. Студияла 55 йәштән 75 йәшкә тиклемге граждандар аҙнаһына ике тапҡыр бушлай шөғөлләнә ала.

Был шәп фекер Баймаҡ ҡалаһының «Ғаилә» хеҙмәте етәксеһе Артур Хәйҙәровта халыҡтың күп һанлы үтенестәренән һуң барлыҡҡа килә. Оло йәштәгеләр бейеүгә өйрәнә алырлыҡ клуб тураһында күптән хыяллана.

- Апайҙар һәм ағайҙар студияла шөғөлләнеп кенә ҡалмаясаҡ, шулай уҡ билдәле педагогтарҙың оҫталыҡ дәрестәренә йөрөйәсәк, профессиональ бейеүселәрҙән бейеү нескәлектәрен өйрәнәсәк. Был уларға буш ваҡыттарын файҙалы үткәрергә ярҙам итәсәк, — ти Артур Хәйҙәров.

Проект бер йылға иҫәпләнгән. Ошо ваҡыт эсендә студияға йөрөүселәр «Ирәндек» бейеү ансамбле ветераны Гөлзифа Әхмәтова етәкселегендә бейеү хәрәкәттәрен үҙләштерәсәк, сәхнәлә үҙеңде нисек тоторға һ.б. өйрәнәсәк.

Ә 2027 йылдың ғинуарында студияла шөғөлләнеүселәр үҙҙәренең оҫталыҡтарын киң йәмәғәтселеккә күрһәтәсәк.