Үҙешмәкәрлек смотр-конкурсы старт алды

Районда Рәсәйҙә иғлан ителгән Халыҡтар берҙәмлеге йылына һәм Башҡортостандағы Ҙур һәм татыу ғаилә йылына арналған ауыл биләмәләре араһында художестволы үҙешмәкәрлек смотр-конкурсы старт алды.

Тәүгеләрҙән булып Урғаҙа ауылы таланттары сығыш яһаны. Улар бейеүҙәр һәм йырҙар аша Тыуған илгә һөйөү, төрлө милләт халыҡтары араһындағы дуҫлыҡты күрһәтә алды. Әйткәндәй, Урғаҙаның халҡы ла күп милләтле, бында башҡорттар, урыҫтар, татарҙар, ҡаҙаҡтар татыу йәшәй.

Артабан эстафетаны Ишбирҙе ауыл биләмәһе дауам итте. Улар “Баймаҡ – Илеш” дуҫлығы һәм “Татыу ғаилә – ил күрке” исемле матур концерт программаһы менән сығыш яһаны.