Бөтә яңылыҡтар
10
Ғаилә йылы
23 Ғинуар , 10:13

Ражаповтарҙы ҡотлайбыҙ!

Сыңғыҙ ауылында йәшәүсе Земфира һәм Биктимер Рәжәповтар Рәсәй Президенты В.В.Путин ҡарары менән "Ата-әсәлек даны" миҙалы менән бүләкләнде.  Тулыраҡ, сайтта:

Сыңғыҙ ауылында йәшәүсе Земфира һәм Биктимер Рәжәповтар Рәсәй Президенты В.В.Путин ҡарары менән "Ата-әсәлек даны" миҙалы менән бүләкләнде. 

Әбйәлил районы һылыуы Земфира Мәсғүт ҡыҙы менән Сыңғыҙ ауылы егете Биктимер Марат улы Сибайҙа педагогия колледжында уҡығанда таныша. Бер-береһенә тәү күреүҙән ғашиҡ булған ике йәш йөрәк мөхәббәттәрен бер йыл һынағандан һуң ғаилә ҡороп ебәрә. Кейәүгә сыҡҡанда Земфираға ни бары 16 йәш кенә була. Уҡыуҙарын тамамлап, ҡулдарына диплом алғас, йәштәр Сыңғыҙға ата-әсә, ҡайны-ҡәйнә янына ҡайтып бергә йәшәй башлай. "Ҡәйнәм менән ҡайныма  ҙур рәхмәтлемен. Мине үҙ ҡыҙҙарылай ҡабул итеп, бергә йәшәгән осорҙа бик татыу йәшәнек. Әле лә ярҙам итеп торалар. Һау ғына булһындар", - тип матур тәьҫораттары менән уртаҡлашты Земфира һылыу. Күпмелер ваҡыттан йәш ғаиләләр өсөн булдырылған программа ярҙамында улар үҙ йорттарын булдыра.

Йәштәр 8 балаға: баһадирҙай 6 улға һәм сәскәләй 2 ҡыҙға ғүмер бүләк иткән.  Ҙур, мөһабәт йортта йәшәү өсөн барлыҡ уңайлы шарттар булдырылған. Балаларға спорт менән шөғөлләнеү өсөн төрлө спорт ҡоролмалдары ҡуйылған. Бында һәр кем үҙенә яҡын спорт төрө менән шөғөлләнә. Шулай уҡ барыһы бергә йыйылғанда улар спорт уйындары уйнап, кистәрен һәм ялдарын файҙалы үткәрәләр. Тырыш, дәртле ғаилә яңыраҡ йорттарын тағы ла ҙурайтты- икенсе этаждарын да зауыҡлы ғына итеп, йәшәргә яраҡлы итеп эшләп ҡуйҙы. Ғаилә башлығы Биктимер ҡул эштәренә оҫта. Ниндәй генә төҙөкләндереү эше булмаһын, барыһын да үҙе эшләй. Һәр эштә уның төп ярҙамсылары- улдары. Эйе, атанан күргән - уҡ юнған, әсәнән күргән-тун бескән, тигән мәҡәл уларҙың ғаиләһенә лә тап килә. Балалар ҙа ата-әсәләренә оҡшап тырыштар, эшһөйәрҙәр. Улар өлгөһөндә хеҙмәт яратып үҫәләр. Рәжәповтар ҡура тултырып һыйыр, йылҡы малы,ҡош-ҡорт үрсетә.  Ауылдаштары ла уларҙы тырыш, уңған ғаилә булараҡ белә. Рәжәповтар 2012 йылда шәхси эшҡыуар булып теркәлеп, ағас эшкәртеү эшен аса.  Буралар, төҙөлөш өсөн таҡталар, утын һорап ауылдаштары ғына түгел, күрше ауыл һәм райондарҙан да мөрәжәғәт итәләр. Биктимер ағас эштәре менән булышһа, Земфира-йорт хужабикәһе. Бәйләү, тегеү, баҡсасылыҡ, аш-һыу әҙерләү эштәренә маһир ул. Шулай уҡ эшҡыуарлыҡ буйынса пландар төҙөү, документтар тултырыу, заказдар ҡабул итеү ҙә уның иңендә. Бер-береһенең, балаларының  һәр башланғысын хуплап, ярҙам итеп йәшәй Биктимер менән Земфира. Өлкән улдары Тимур менән Ғәзинур яғыулыҡ-энергетика колледжында белем ала,Динислам,Баязит,Ильяс һәм Эльвира - мәктәп уҡыусылары. Бәләкәс Ибраһим һәм Гүзәлиә балалар баҡсаһына йөрөй.

Спортты үҙ иткән ғаилә ауылда үткән һәр спорт ярышында үҙен һынап ҡарай. Спорт-сәләмәт йәшәү рәүеше, ти улар. Шулай уҡ Рәжәповтар мәсеткә һәм унда үткән барлыҡ дини байрамдарҙы ла ҡалдырмай йөрөй. 2021 йылда күп балалы татыу ғаилә башҡалала үткән "Ғаилә ҡиммәттәре-2021" фестивалендә ҡатнашып еңеү яулай. Ғөмүмән, һәр яҡлап тырыш һәм дәртлеләр. Ғаиләлә һәр өлкә буйынса алынған Маҡтау ҡағыҙҙары һәм Рәхмәт хаттарының иҫәбе-һаны юҡ! Баларын матур итеп тәрбиәләгән әсә бынан бер нисә йыл элек Республика етәкселеге тарафынан "Әсәлек даны" миҙалы менән бүләкләнгән ине, ә быйылғы йыл ғаилә тағы ла юғарыраҡ награда - "Ата-әсәлек даны" орденына лайыҡ булды.

Рәжәповтар ғаиләһен ысын күңелдән ҡотлайбыҙ. Ҡотло, матур йортоғоҙҙан балаларҙың шат тауышы тынмаһын! Һеҙгә артабан да һаулыҡта, бәрәкәтле мул тормошта йәшәргә яҙһын"

 

Автор:Альбина Байзигитова
Читайте нас: