Яҡташыбыҙҙың сираттағы ярҙамы

Илшат Азамат улы Тажетдиновты республикала билдәле дәүләт эшмәкәре, танылған ғалим-иҡтисадсы, Башҡортостанды үҫтереүгә үҙенең лайыҡлы өлөшөн индергән шәхес булараҡ беләләр.

Баймаҡ районын һәм тыуған төйәге - Икенсе Этҡол ауылын үҫтереүгә Илшат Азамат улы күп көс һала, яҡташтары тураһында даими хәстәрлек күрә.

Махсус хәрби операциялағы яугирҙәребеҙҙе, уларҙың ғаиләләрен, ата-әсәләрен күтәрмәләүгә, уларға ярҙам күрһәтеүгә лә Илшат Азамат улы үҙ өлөшөн индерә.Бына икенсе йыл инде ул ҡорбан салдырып, МХО-лағы яугирҙәребеҙҙең ғаиләләренә таратыуҙы ойоштора.

Был изге һәм сауаплы ғәмәлде быйыл да атҡарып сыҡты абруйлы яҡташыбыҙ.Ошо көндәрҙә ҡорбан салдырып, кисә яугирҙәребеҙҙең ғаиләләренә шәхсән үҙе ҡорбан ите һәм Яңы йыл күстәнәстәре таратып сыҡты.Икенсе Этҡол һәм Байым ауылдарынан бөтәһе 23 ғаиләгә ошондай хөрмәт күрһәтелде.Был изге эште атҡарып сығыуға Ниғәмәт ауыл биләмәһе башлығы Амур Әминев та үҙ өлөшөн индерҙе. Яҡташтары ошондай иғтибары һәм хәстәрлеге өсөн Илшат Азамат улына оло рәхмәттәрен еткерҙе.

Афарин, изгелек бер ҡасан да ерҙә ятып ҡалмаҫ, ти халыҡ.Илшат Азамат улына эшендә яңы ҡаҙаныштар, рух ныҡлығы, ә яугирҙәребеҙгә тыуған ерҙәренә имен-һау ҡайтыуҙарын теләп ҡалабыҙ.