“Донъяны яратып йәшәйем”

Фирүзә Ишҡыуатова – Йәрмөхәмәт ауылы ҡыҙы. Алты бала араһында дүртенсеһе булып донъяға килә. Уларға атайҙары Айса Ибраһим улы һәм әсәйҙәре Мөкминә Абдулла ҡыҙы матур тәрбиә һәм белем биреп, ел-ямғырға тейҙермәй, тормош юлына баҫтыра. Атай кеше үҙенең өлгөһөндә улдарына ир тәрбиәһе биреп, хеҙмәтте яратырға өйрәтһә, әсәйҙәре ҡыҙҙарына уңған хужабикә серҙәренә төшөндөрә.

Бала саҡтан белем алырға ынтылған Фирүзә Айса ҡыҙы тәүҙә урындағы мәктәпте тамамлай, һуңынан Ярат ауылында уҡыуын дауам итә. 8-се кластан һуң Сибай педагогия училищеһына килә. “Башланғыс кластар уҡытыусыһы” тигән дипломды ҡулына алғас, йүнәлтмә буйынса хеҙмәт юлын Яңауыл районында башлай. Бер йылдан һуң ғаилә хәле буйынса, кире тыуған ауылына ҡайта. Бында ул аҙ комплектлы мәктәп булып һаналған белем усағында балаларға хәреф танырға, яҙырға өйрәтеп, уларҙы белем үренә әйҙәй. Бер үк ваҡытта ситтән тороп юғары белем алыуға ла өлгәшә.

1988 йылда Фирүзә Ишҡыуатова Ғәҙелбай ауылына килен булып төшә - Сәлимйән Вәлиәхмәт улы менән ғаилә ҡора. Матур ғаиләлә Нурйән һәм Әлиә исемле балалар үҫә. Ҡыҙғанысҡа ҡаршы, ғаилә башлығы 43 кенә йәшендә вафат булып ҡала. Яңғыҙ ҡанат ҡаҡҡан Фирүзә апай тормош һынауҙарына бөгөлөп төшмәй. Киреһенсә, сәмләнеп һәм зәмләнеп донъя көтә башлай. Балаларына матур тәрбиә биреп, үҙ аллы тормош юлына баҫтыра. Ҡыҙы Әлиә әсәһенең һөнәрен һайлай. Тәүҙә Сибай педагогия училищеһын, һуңынан Магнитогорск дәүләт университетында юғары белем ала. Бөгөн ул Әбйәлил районының Асҡар мәктәбендә башланғыс кластар уҡытыусыһы булып эшләй. Тормош иптәше менән бер ул һәм ике ҡыҙ тәрбиәләй. Улы Нурйән – иретеп йәбештереүсе, ла автомеханик та булып эшләй. Оҫта ҡуллы һөнәр эйәһенең хеҙмәтенә һорау ҙур.

Утыҙ йыл ғүмерен балаларға белем биреүгә арнай Фирүзә Айса ҡыҙы. Ул Ғәҙелбай, Беренсе Этҡол мәктәптәрендә лә эшләй. Бай тәжрибә туплаған уҡытыусыны башланғыс кластарҙың методик берекмә етәксеһе итеп ҡуялар. Мәктәптең профком ағзаһы ла булып тора. “Йәш хәбәрсе” түңәрәген етәкләй. Уның ҡул аҫтында уҡыусылар шиғыр ижад итергә, хикәйә яҙырға өйрәнә. Улар йыш ҡына “Йәншишмә” гәзитендә, “Аманат” журналында баҫылып сыға. Тырышлығы һәм уңғанлығы арҡаһында абруй яулаған уҡытыусыны ауыл Советына депутат итеп тә һайлайҙар. Фиҙаҡәр хеҙмәте район хакимиәтенең, мәғариф бүлегенең, ауыл Советының Почет грамоталары, Рәхмәт хаттары менән баһалана.

Мәғариф ветераны хаҡлы ялда булыуына ҡарамаҫтан, бөгөн дә әүҙем тормош менән йәшәй. Ауылда уҙған бер генә мәҙәни саранан да ситтә ҡалмай. Урындағы “Сәсмәүер” фольклор ансамбленең әүҙем ағзаһы булып тора.

Фирүзә апайҙың бөтмөрлөгө һәр ҡайҙа ла сағыла. Күпләп мал-тыуар, ҡош-ҡорт көтә, йәшелсә-емеш үҫтерә. Баҡсаһындағы сәскәләр иртә яҙҙан алып, ҡара көҙгә тиклем йәм биреп ултыра.

- Был донъяла йәшәүем менән бәхетлемен, - тине беҙҙең Фирүзә апай. – Аллаға шөкөр, балаларымдың, туғандарымдың, яҡындарымдың һәр ваҡыт таянысын тоям. Эргәмдә ышаныслы дуҫтарым, ауылдаштарым, хеҙмәттәштәрем бар. Юлыма һәр ваҡыт изге күңелле кешеләр осрай.  Тик донъялар ғына тиҙерәк тынысланһын инде. Яугирҙәребеҙ ҡайтып, ғаиләһен ҡосһон.

Тормошонан йәм, ғәм табып, һәр нәмәнән ҡыуаныс кисергән Фирүзә апай бөгөн күптәргә өлгө булырлыҡ.

Лилиә ТАКАЕВА.