Йәрмөхәмәттәр үрнәк күрһәтә

Кисә Йәрмөхәмәт ауылында Әсә көнөнә арналған тантаналы сара үтте. Әҙәби-музыкаль кисәгә махсус хәрби операциялағы яугирҙәрҙең әсәләре, шулай уҡ башҡа гүзәл зат вәкилдәре саҡырылды.

Тантанала Ярат ауыл биләмәһе башлығы Альбина Байымова ҡатын-ҡыҙҙарҙы байрам менән тәбрикләне, уларға намыҫлы хеҙмәттәре, ауыл тормошонда әүҙем ҡатнашҡандары, Ватаныбыҙҙың лайыҡлы ул-ҡыҙҙары тәрбиәләгәндәре өсөн рәхмәт белдерҙе.Альбина Булат ҡыҙы МХО-ла ҡатнашҡан яугирҙәрҙең әсәләренә Рәхмәт хаттары тапшырҙы.

Ауылдың йәмәғәт тормошонда әүҙем ҡатнашҡан, махсус хәрби операция зонаһына гуманитар ылау әҙерләүгә тос өлөш индергән, эштәрендә яҡшы һөҙөмтәләргә ирешкәндәре өсөн Йәрмөхәмәт мәктәбе уҡытыусыһы Рәхилә Ишҡыуатова һәм ашнаҡсыһы Гөлйемеш Байымова, ҡатын-ҡыҙҙар советы рәйесе Нәзилә Байымова Баймаҡ районы башҡорттары ҡоролтайының Рәхмәт хаттары менән бүләкләнде.

Кисәлә Ярат, Ғүмәр, Йәрмөхәмәт ауылдары таланттары концерт менән сығыш яһаны.

Йәрмөхәмәт ауылы район ҡоролтайының "Сәләмәт ауыл" конкурсында ҡатнаша, уға ярашлы маҡсатлы эш алып бара.Ҡоролтайҙың "Бөтә ауыл менән - "Һаҡмар"ға" проектына ихлас ҡушылып, 31 йортта йәшәгәндәрҙең барыһы ла район баҫмаһына яҙылды.Афарин, йәрмөхәмәттәр!Ысын дуҫтар тап шулай була!