Әсәләр тәбрикләнде

                          Әсә булыу - яуаплы һәм изге бурыс

Районда йыл һайын Әсә көнөн тантаналы шарттарҙа үткәреү матур йолаға әйләнде.

Уҙған аҙнала халыҡ ижады үҙәгендә ойошторолған сара әсәләргә байрам кәйефе бүләк итте.  Тантаналы сарала район хакимиәте башлығы Азамат Иҙрисов, район Советы рәйесе Илдар Бәхтийәров ҡатнашты. Улар әсәләрҙе байрамдары уңайынан ҡотлап, изге теләктәрен, рәхмәт һүҙҙәрен еткерҙе.

Әсә булыу - яуаплы һәм изге бурыс. Ҡатын-ҡыҙ өй йылыһын һәм  ҡотон һаҡлап ғына ҡалмай, ә дәүләт эшендә лә эшләп өлгөрә. Йәмәғәт эштәрендә әүҙемдәр, һөнәрҙәре буйынса төрлө өлкәлә уңышлы эшләүселәр, шул уҡ ваҡытта балаларына матур тәрбиә һәм белем биреүсе әсәләр тәбрикләнде. Уларға Рәхмәт хаттары тапшырылды.

Улар араһында Баймаҡ ҡалаһында йәшәүсе Миңзәлә Исмәғилова ла бар. Ул - 6 бала әсәһе. Өлкән улына 20 йәш, ғаиләле, ҡыҙы Айзилә Гай ҡалаһында медицина колледжында уҡып йөрөй, Заһир һәм Замир исемле игеҙәктәр  Урал аръяғы агросәнәғәт колледжының 1-се курсында иретеп-йәбештереүсе һөнәрен үҙләштерә, Эмиль - 1-се мәктәптә 5се класта белем алһа, кескәйҙәре Иҙел «Миләш» балалар баҡсаһына йөрөй. Миңзәлә Рәис ҡыҙы 1-се мәктәптә йыйыштырыусы булып эшләй. Үҙ эшенә яуаплы ҡараған хеҙмәткәр мәктәп коллективы араһында ла абруй ҡаҙанған. «Иң мөһиме - балаларым һау һәм бәхетле булһын. Уларҙы матур итеп аяҡҡа баҫтырырға яҙһын. Ер йөҙөндәге барлыҡ әсәләргә лә ғаилә именлеге, балалар ҡыуанысы теләйем. Бөгөн миңә Рәхмәт хаты тапшырыусы район хакимиәте етәкселегенә ҙур рәхмәт һүҙҙәре еткерәм», - тине М.Исмәғилова.

Тәбрикләү өлөшөнән һуң, ҡунаҡтар бай йөкмәткелде байрам концертын ҡараны. Халыҡ ижады үҙәгенең, балалар баҡсаһында тәрбиәләнеүсе кескәйҙәрҙең, балалар ижады үҙәге янында эшләп килгән түңәрәктә шөғөлләнеүселәр, төрлө ансамблдәр әҙерләгән йыр-бейеүҙәр әсәләргә матур байрам кәйефе бүләк итте.

Альбина Байегетова.