Районда баш ҡаланың теш табиптары эшләй

Һуңғы йылдарҙа республикабыҙҙа һаулыҡ һаҡлау өлкәһенә айырыуса иғтибар бүленә. Күптән түгел районыбыҙҙа “Сәләмәтлек автопоезы” эшләне, ул  ауылдарҙа йәшәүсе бик күп кешене ҡабул итте. 

Ул ҡайтып, күп тә ваҡыт үтмәне, 5 августа районыбыҙҙа күсмә стоматология моделе эш башланы. Республика клиник дауаханаһының белгестәр  бригадаһы Темәс һәм Түбә ауылдарында “Граждандарға бушлай медицина ярҙамы күрһәтеү дәүләт гарантиялары” программаһы сиктәрендә һәм Республика Башлығы Радий Хәбировтың ҡушыуы буйынса өлкәндәрҙе ике аҙна дауамында, йәғни 17 авгусҡа тиклем ҡабул итәсәк. 

Темәстәрҙе Республика стоматология поликлиникаһынан стоматолог-терапевт Лилиә Исмәғилева, стоматолог-хирург Михаил Шапошников, шәфҡәт туташы Л.Ризуанова ҡабул итә. Ауыл халҡы теш табиптарына күренеп, теш һәм ауыҙ ҡыуышлығына диагностика эшләтеп ҡалырға ашыға. Шулай уҡ Темәс һәм яҡынтирәләге ауылдарҙа йәшәүселәр аутофлуоресцент стоматология аппаратын ҡулланып, ауыҙ ҡыуышлығының яман шеш ауырыуҙарын диагностикалау мөмкинлегенә эйә булды.

Баймаҡ үҙәк ҡала дауаханаһының стоматология бүлеге мөдире Артур Йәнтүрин әйтеүенсә, бындай программа буйынса һуңғы йылдарҙа ПАЗ-4234  автобусы базаһында булған күсмә стоматология кабинеты республика буйлап тәғәйен маршрут буйынса ҡабул итеүҙәр ойоштора. Был айырыуса ауыл халҡы өсөн бик уңайлы. Артур Рауил улының һүҙҙәрен йөпләп, Темәс ауылынан Мансур Хисамов үҙ тәьҫораттары менән уртаҡлашты: “Күсмә стоматология кабинеты урынлашҡан автобустың таҙа һәм яҡты булыуы тәүҙә үк иғтибарҙы йәлеп итте. Башта ауыҙҙың эсенә диагностика үткәрҙеләр:  ҡайһы тешкә пломба һалырға, ҡайһы тештәргә коронка кейҙерергә кәңәш иттеләр. Тештәргә ултырған таштарҙы ла алып ташланылар. Хатта үҙемде  түләүле клиникала ултырған кеүек хис иттем. Шул тиклем дә яғымлы һөйләшәләр”. 

Ауыл халҡын хәстәрләп ҡабул ителгән программалар артабан да эшләһен, ә халыҡ улар ярҙамында сәләмәтлеген нығытһын, тигән теләктә ҡалабыҙ. 

Эльмира Кейекҡужина.