Сәләмәтлек автопоезы халыҡты ҡабул итә

Республикала “Сәләмәт республика – сәләмәт төбәк” акцияһы дауам итә. Был күләмле проект дүртенсе йыл үткәрелә һәм ул беренсел медицина ярҙамын камиллаштырыу, ауыл халҡына медицина ярҙамы алыу кимәлен күтәреү маҡсатын күҙ уңында тота.

Баймаҡ районында ла күсмә сәләмәтлек автопоезы халыҡты ҡабул итә. Унда флюорография, маммография, ЭКГ, УЗИ үтергә, анализдар тапшырырға, вакцина эшләтергә мөмкин. Шулай уҡ терапевт, педиатр, невролог, гинеколог, хирург, стоматолог, офтальмолог, кардиолог ҡабул итә. Быға тиклем сәләмәтлек поезы Йомаш, Аҡморон, Таулыҡай зоналарында һәм Баймаҡ ҡалаһында эшләне.

7 һәм 10 июлдә күсмә үҙәк Таулыҡай ауылында булды. Был ауыл биләмәһендә терапевт – 68, хирург – 61, педиатр – 63, кардиолог – 72, гинеколог – 51, офтальмолог – 71, невролог – 63, стоматолог – 57 кешенең һаулығын тикшерҙе. 71 кеше УЗИ, 92 – флюорография, 67 кеше маммография үткән. “Табиптарҙың ауылдарға килеп медицина тикшереүе үткәреүе бик уңайлы, кәрәкле белгестәргә күренеп, һаулығыбыҙҙы тикшертеп, һорауҙарыбыҙға яуап алып ҡалдыҡ. Был акцияны ойоштороусыларҙың барыһына ла рәхмәт һүҙҙәрен еткерәбеҙ”, - ти ауыл халҡы.
Ә бөгөн автопоезд Беренсе Этҡолда халыҡты ҡабул итә.