Сәсән теле менән ҡотҡарҙы

Үткән быуатттың етмешенсе йылдары. Колхоз идараһы ултырышы бара. Бер ферма мөдиренең эшен тикшерәләр. Уны малға бесән етмәү ҡурҡынысы тыуҙырған өсөн ғәйепләп, эштә ҡалдырыу-ҡалдырмау мәсьәләһен ҡуйҙылар. Һүҙҙе партия райкомының даими вәкиле, райондың сәсән телле ир уҙаманы Рәфҡәт Яҡуп улы Күсәбаев алды. Ул сығышын:

Иптәш Заман,

Яҙ көтәңме һаман,

Кормаң етмәү яман,

Иртән нимә һалаң,

Юҡты ҡайҙан алаң?

Бәлки, һалырһың

Тапһаң әгәр һалам.

Бәлки, һалмаҫһың,

Эшһеҙ тороп ҡалһаң,-

тигән шиғри юлдар менән башланы һәм артабан да шиғри юлдар менән дауам итте. Бөтә идара ағзалары көлә башланы, көсөргәнешлек юҡҡа сыҡты. Ә мөдиргә, эштән сығарыу түгел, шелтә лә бирмәнеләр. Бесән менән ярҙам итеү ҡарары сығарҙылар. Сәсән теле күп күңелһеҙлектәрҙән ҡотҡара, тигәндәр. Дөрөҫтөр...

Йәүҙәт Мөхәмәтйәров.