Нәсимә Хәсәнова күркәм ғүмер байрамын билдәләй

Нәсимә Мөхәмәтхәбиб ҡыҙы Хәсәнова 1950 йылдың 13 мартында Ярат ауылында күп балалы ғаиләлә дүртенсе бала булып донъяға килә.

Атаһы Әхмәтов Мөхәмәтхәбиб Хәлфетдин улы ғүмер буйы Карл Маркс исемендәге колхозда етәксе урындарҙа эшләй. Лайыҡлы хеҙмәте өсөн күп наградаларға лайыҡ була. Шуларҙың береһе-Хеҙмәт Ҡыҙыл Йондоҙ ордены. Әсәһе Мәрхәбә Фәтхулла ҡыҙы оҙаҡ йылдар колхозда икмәк бешереүсе булып эшләй. Был ябай ғына ғаиләгә ҡарап һоҡланмау мөмкин түгел. Мөхәмәтхәбиб Хәлфетдин улы һәм Мәрхәбә Фәтхулла ҡыҙы икеһе лә ауыл ерендә тыуып үҫеп, һигеҙ балаға ғүмер биреп, үҙҙәре лә ас-яланғас, аслы-туҡлы йәшәйбеҙ тимәй, бөтәһен дә лайыҡлы тәрбиәләп, уҡытып, юғары белем биреп, оло тормош юлына сығарыуҙары үҙе бер батырлыҡ түгелме!

Өлкәндәре Ғәлимә менән Сәлимә Стәрлетамаҡ педагогия институтын уңышлы тамамлап, икеһе лә уҡытыусы булып эшләй. Минниәхәт нефть институтында белем алып, металлург булып китә. Рәсимә Өфөнөң Башҡорт дәүләт университетының филологогия факультетын тамамлап, Ярат ауылында уҡыта. Рәмил Башҡортостан ауыл хужалығы институтының бухгалтер-иҡтисадсы факультетында уҡып сығып, Баймаҡ ҡалаһында төрлө учреждениеларҙа етәксе вазифаларын башҡарҙы. Ҡыҙғанысҡа ҡаршы, ул бик иртә вафат булды. Камил Магнитогорск дәүләт педагогия институтын тамамлап, Ярат мәктәбендә физика уҡытыусыһы булып эшләне. Малайҙарҙың иң кесеһе булараҡ, атай-менән әсәйҙе ҡарау уның иңенә төшә һәм ул был изге бурысты еренә еткереп үтәй. Рәйсә, Рәмил ағаһы һымаҡ, Башҡортостан ауыл хужалығы институтының иҡтисад факультетын тамамлап, оҙаҡ йылдар ДРСУ-ла баш иҡтисадсы булып эшләне. Хәҙер ул дин юлында, хажға барып ҡайтты, әлеге ваҡытта Баймаҡ мәсетендә дини дәрестәр алып бара.

Нәсимә Мөхәмәтхәбиб ҡыҙы 1967 йылда Беренсе Этҡол урта мәктәбен тамамлап, колхозда бер йыл һауынсы булып эшләй ҙә, 1968 йылда Стәрлетамаҡ педагогия институтының рус теле һәм әҙәбиәте факультетына уҡырға инә. 1973 йылда уңышлы тамамлап, Ниғәмәт урта мәктәбендә уҡытыусы булып эш башлай. 1979 йылда тормош иптәше Әхтәм Хәлим улы Хәсәновты Баймаҡҡа эшкә саҡыраралар. Нәсимәгә Мөхәмәтхәбиб ҡыҙына райондың ЗАГС бүлеген етәкләргә тәҡдим итәләр. Ул ваҡытта ЗАГС бүлегенә әллә ни артыҡ әһәмиәт бирелмәй. Документация тултырыу, архив, тантаналы никах, яңы тыуған баланы хөрмәтләп теркәү - барыһы бәләкәй генә бүлмәлә үткәрелгән. Граждандарҙың айырылышыуын да ЗАГС бүлеге хәл иткән. Әммә ЗАГС-тың бурысы ғаиләне айырыу түгел, ә һаҡлап ҡалыу була. Шул маҡсаттан Нәсимә Хәсәнова төрлө һөйләшеүҙәр, аңлатма эштәре алып бара. Республикала үткәрелгән “Иң яҡшы ЗАГС бүлеге” конкурсында ҡатнашып, Баймаҡ ЗАГС-ы ике тапҡыр ҡала һәм райондар араһында икенсе урынға лайыҡ була.

Әйтергә кәрәк, был уңыштарға ирешеүҙә 17 йыл бергә эшләгән Гөлнәзирә Ишморат ҡыҙы Низамованың өлөшө бик ҙур. “Ул һәләтле, тырыш, үҙ эшен еренә еткереп башҡарған белгес булды,”—тип иҫкә ала Нәсимә Мөхәмәтхәбиб ҡыҙы уның тураһында.

Нәсимә Хәсәнова 24 йыл ЗАГС бүлеге етәксеһе булып эшләү дәүерендә Башҡортостан Республикаһының, республика ЗАГС идаралығының һәм район хакимиәтенең төрлө Почет грамоталары менән бүләкләнә. 2003 йылда Нәсимә Мөхәмәтхәбиб ҡыҙы “Башҡортостан Республикаһының атҡаҙанған мәҙәнәиәт хеҙмәткәре” исеменә лайыҡ була.

Тормош иптәше Әхтәм Хәлим улы менән өлгөлө ғаилә ҡороп, береһенән-береһе уңған өс балаға ғүмер бирәләр. Өлкән ҡыҙҙары Гөлназ район ветеринария станцияһында белгес булып эшләй, улдары Рөстәм Сибай ҡалаһы филармонияһының солисы, “Башҡортостан Республикаһының атҡаҙанған артисы”, кесе ҡыҙҙары Розалия Өфө ҡалаһында һалым инспекцияһында эшләй. Нәсимә Мөхәмәтхәбиб ҡыҙы 7 ейән-ейәнсәре менән дә бәхетле.

Нәсимә Мөхәмәтхәбиб ҡыҙы, хаҡлы ялда булһа ла, тик ултырмай, әүҙем тормош алып бара. 2013 йылдан билдәле “Ҡомартҡы” халыҡ йырҙары ансамблендә (етәксеһе Сөмбөл Юлбахтина) шөғөлләнә. Улар район һәм Өфө сәхнәләрендә сығыш яһай, төрлө конкурстарҙа, сараларҙа ҡатнаша.

Бөгөн ЗАГС бүлегенең Баймаҡтың ғорурлығы булған яңы бинала дәртләнеп эшләүенә ҡыуана Нәсимә Мөхәмәтхәбиб ҡыҙы. “Коллегаларым өсөн шатмын, тырышып эшләргә бөтә шарттар ҙа булдырылған. Уларға ныҡлы һаулыҡ, ғаилә именлеге, еңел булмаған эштәрендә уңыштар теләйем,”—ти ул.

Ошо көндәрҙә Нәсимә Мөхәмәтхәбиб ҡыҙы матур, күркәм ғүмер байрамын—75 йәшлек оло юбилейын билдәләй. Уға беҙ, коллегалары, алдағы тормошонда именлек, һаулыҡ, балалар изгелеге, туғандарының ҡәҙер-хөрмәтен тойоп, оҙон-оҙаҡ йәшәүен теләйбеҙ.

Мирза Абдуллин, район хакимиәтенең ветерандар советы рәйесе.