Изгелек нурҙарын таратыусылар

Махсус хәрби операция беҙҙең барыбыҙ өсөн дә ысын һынауға әүерелде. Яугирҙәребеҙ алдынғы һыҙыҡҡа Ватаныбыҙҙы һаҡларға юлланғандан һуң, халыҡ та улдарына ярҙам итеү өсөн барыһын да эшләй. Айырыуса әүҙем булған оло быуын вәкилдәренә, хаҡлы ялдағыларға рәхмәт һүҙҙәрен еткерге килә.

Баймаҡ ҡалаһында урынлашҡан “Яҡлаусы Фәрештә” штабында көн һайын осратырға була уларҙы. Район ветерандар советы рәйесе Көнһылыу Әхмәтова етәкселегендә эшләгән шәп һәм уңған апайҙар тыуған еребеҙҙең ғорурлығына әүерелде. Зөлфиә Зәйнулла ҡыҙы Исламғолова, Таңһылыу Әхтәм ҡыҙы Арсланова, Миңзәлә Ғәбит ҡыҙы Ямантаева, Татьяна Николаевна Назарова, Фәрзәнә Хәйбулла ҡыҙы Хәсәнова.

“Уңғанлығы, матур күңеле менән айырыла улар. Маскировка селтәрен үргәндә, ҡулдарына күҙ эйәрмәй. Йәштәрҙе лә өйрәтәләр. Миңзәлә Ғәбит ҡыҙы яугирҙәребеҙгә ярҙам итеү өсөн Мерәҫтән көн дә килеп етә. Халҡыбыҙҙың ошондай берҙәмлеге махсус хәрби операцияла еңеүебеҙгә ҙур өлөш индерә”,-тине Көнһылыу Әхмәтова.

Эйе, Көнһылыу Әҙеһәм ҡыҙы үҙе лә ирекмәнлек эшенә ололарҙы йәлеп итә, ваҡыты булыу менән, ярҙамға, штабҡа ашыға. Уларҙың гөрләп, изге теләктәр менән селтәрҙе үреүен ҡарап, “беҙҙең халыҡты еңеүе мөмкин түгел” тигән уй килә.

Еңеүгә тос өлөш индергән ошо шәп ханымдарҙы яҙ байрамы менән ҡотлап, уларға ныҡлы һаулыҡ, бәхет, балалар игелегендә йәшәүҙәрен теләйбеҙ!

Гүзәл Иҫәнгилдина.