Йылмайыуынан наҙлы нур тама...

Нимәнәндер ҡыҙыҡ табып, сыңғырлатып көлөп ебәргән, уйландырырлыҡ хәлгә башын сайҡап ҡуйған, бер-бер артлы ҡыҙыҡлы хәбәр йә көләмәстәр һөйләп көлдөргән Земфира күҙ алдыма сәсенә ҙур аҡ таҫмалар таҡҡан беренсе класс уҡыусыһы булып килеп баҫа. Беҙҙән бер башҡа оҙонораҡ булған ҡыҙыҡай тиҙ арала барыһы менән дә уртаҡ тел табып, Миңнур Арыҫлан ҡыҙы Хисмәтуллина, унан Гөлнур Усман ҡыҙы Лоҡманова етәкләгән кластың ғына түгел, ә тотош 1-се мәктәптең тормошонда янып йәшәне.

Кескәй саҡта уның шәп йүгереүенә, матур йырлауына, яҡшы уҡыуына һоҡлана инек. Ниндәйҙер йырҙы башҡарырға кәрәк булһа, иң тәүҙә Земфираның көслө тауышы яңғырай, уға класташтар ҡушылыр ине. Мәктәп, район йыйындарында тасуири итеп шиғыр һөйләп, алдан йөрөнө. Малыш биҫтәһендә йәшәгән класташыбыҙҙың йортонда ла булырға ярата инек. Сөнки бында беҙҙе өлкәндәр кеүек ҡабул иттеләр, Хәсән ағай ололарса беҙҙең хәлде белешһә, әсәһе Гөлнур апай сәй табынына ултыртып, тәмлекәстәр менән һыйлар ине. Ғаиләлә үҫкән ике ҡыҙ – Зөлфиә һәм Земфираның иҫ китмәле хәстәргә һәм һөйөүгә сорналып үҫеүе, уларҙың икеһенең дә юлын яҡтыртып, киләсәктәренә аҡ йәймә йәйгәндер ҙә.

Пионер тормошо менән янып йәшәгән Земфира, ваҡыты еткәс бер тауыштан комсорг итеп һайланды. Мәктәптәге әүҙем тормошон ул Сибай институтына уҡырға ингәс тә дауам итте. Бында ла тик яҡшы билдәләргә уҡып, диплом алып сыҡҡан йәш белгес тәүҙә психолог булып эшләне. Шул уҡ ваҡытта райондың йәмәғәт тормошонда ҡайнап йәшәне. Тормош ипшәте, Темәс ауылы егете Валер Яхин менән улар бер-береһенә тәү ҡараштан ғашиҡ була. Йәш ғаиләнең бер-береһен аңлап, мөхәббәттә йәшәүе уларҙың хеҙмәт юлына ла үҙ балҡыштарын һалды. Валер Яхин янғын һүндереү хеҙмәтендә оҙайлы йылдар маҡтаулы эшләп, юғары хеҙмәт ҡаҙаныштарына, бик күп Маҡтау ҡағыҙҙарына, наградаларға лайыҡ булды. Земфира Хәсән ҡыҙы оҙайлы йылдар район хакимиәтендә – алмаштырһығыҙ хеҙмәткәр. Бөгөн ул ҡатмарлы һәм яуаплы булған дөйөм бүлекте етәкләй. Бынан тыш республика, ил өсөн мөһим булған сәйәси кампанияларҙа әүҙем ҡатнашып, Почет грамоталарына лайыҡ булды. Шулай уҡ район башҡорттары ҡоролтайының башҡарма комитеты, ҡатын-ҡыҙҙар советының әүҙем ағзаһы ла ул.

Яхиндарҙың ҡотло, бәхет нурҙарына сорналған йортонда Луиза һәм Батырхан исемле шәп балалар үҫә. Луиза Валер ҡыҙы медицина юлын һайлап, йәш булыуына ҡарамаҫтан, был йүнәлештә уңыштар ҡаҙана. Батырхан Яхин яҡшы уҡыуы, төрлө сараларҙа ҡатнашып, еңеүҙәр яулауы менән айырыла. Алма ағасынан алыҫ төшмәй тип, нәҡ Яхиндарҙың һөйөклө балалары тураһында әйтелгәндер.

Наҙлы ҡарашлы тормош юлдашы, хәстәрлекле әсәй, уңған хужабикә. үҙ эшенең оҫтаһы Земфира Хәсән ҡыҙы Яхина ошо көндәрҙә үҙенең матур юбилейын билдәләй. Уға артабан да бәхет-мөхәббәткә сорналып йәшәргә, балаларының тик игелеген татырға, тағы ла юғарыраҡ уңыштар ҡаҙанырға яҙһын.

“Сәләм, класташ!”-тигән яғымлы тауышың артабан да шулай оҙайлы йылдар күңелде йылытһын, Земфира...

Гүзәл Иҫәнгилдина.