“Беҙ Ишбирҙелә”, - тип ҡасып ятыуҙар бөттө”...

Ишбирҙе – районыбыҙҙың иң төпкөл ауылдарының береһе. Был тарафтарҙа керәҙле бәйләнештең булмауына күнегеп тә бөткәнбеҙ инде. Ниһайәт, ошо көндәрҙә бында заманса бәйләнеште булдырыу буйынса эштәр башланды.

- Беҙҙә “МТС” селтәре буласаҡ, - тине Ишбирҙе ауыл биләмәһе башлығы Гөлшат Иҫәндәүләтова. - Кисә уның ҡоролмаларын алып килделәр, бөгөн ҡора башларға һүҙ бирҙеләр.

Шулай итеп бынан һуң телефондарҙы һүндереп: “Беҙ Ишбирҙелә”, - тип ҡасып ятыуҙар бөттө. Ишбирҙегә лә керәҙле бәйләнеш килеп етте. Ошо көндәрҙә “МТС” бәйләнеше сафҡа инәсәк, тигән өмөттә ҡалабыҙ.