Салауат вариҫтары сигенә белмәй

Салауат вариҫтары сигенә белмәй!

Шәмбе көнө ҡаланың «Труд» стадионы Урал аръяғы райондарының 300-ҙән ашыу «шайморатовсы» һын үҙенә йыйҙы. Рәсәй геройы генерал -майор Миңлеғәле Шайморатов кубогына йыл һайын республика  райондарында үткән ярыш быйыл Баймаҡ ерлегендә ойошторолдо. «Йәйге шайморатовсылар уйыны» ның төбәк этабы ярышында 33 команда ҡатнашты. Үҙҙәрен спорт өлкәһендә һынап ҡарарға Баймаҡ, Сибай, Белорет, Межгорье ҡалаларынан, Хәйбулла, Йылайыр, Ейәнсура, Әбйәлил, Бөрйән, Учалы, Баймаҡ һәм Белорет райондары мәктәптәренең 5-8-се  шайморатов  класы  уҡыусылары килде.

Сара ҡаланың  «Саптар»  өлгөлө бейеү ансамблендә шөғөлләнеүсе балаларҙың  «Алға, Рәсәй!» бейеүе менән башланды. Рухлы бейеү конкурсанттарға дәрт өҫтәне. Сарала БР мәғариф һәм фән министрлығынан шайморатов кластары кураторы Юлай Вәлиуллин ҡатнашты. Ул йыл һайын үткәрелеп килгән бындай ярыштарҙа уҡыусыларҙа  илһөйәрлек рухы тәрбиәләүҙе, башҡа райондан килеүсе балалар менән  үҙ-ара аралашыуҙы, яңы дуҫтар табыуҙы, тәжрибә уртаҡлашыуҙы маҡсат итеп ҡуйыуын һыҙыҡ өҫтөнә алды һәм бәйгеселәргә уңыштар теләне.

Ярыш йүгереү, урындан оҙонлоҡҡа һикереү, турникта күтәрелеү һәм башҡа спорт төрҙәрен  үҙ эсенә алды. Бәйге көсөргәнешле һәм сәмле барҙы. Һәр команда үҙ районына еңеү алып ҡайтырға теләне. Мәртәбәле жюри ағзалары ярыш һөҙөмтәләре буйынса һәр кластан еңеүсене билдәләне. Улар рәтендә Баймаҡ лицей- интернатының 7- се шайморатовсылар класы ла бар ине. Еңеүселәр 28 сентябрҙә Ҡырмыҫҡалы районында үтәсәк финал этабында район данын яҡлаясаҡ. Афарин, балалар! Шайморатовсылар формаһын ғорур кейеп йөрөгөҙ. «Салауат тоҡомо сигенә белмәй»,! тигән саҡырыуға тоғро булығыҙ, һынауҙарҙан һәм юлығыҙҙа осраған ауырлыҡтарҙан ҡурҡмай һәр саҡ алға барығыҙ!

Альбина Байегетова.