Төҙөкләндереү дауам итә

Коронавирус инфекцияһына бәйле үҙизоляция режимы осоронда ла ауылыбыҙҙы, эргә-тирәбеҙҙе тәртиптә, таҙалыҡта тотоп, төҙөкләндереү эштәрен алып барырға тырышабыҙ, тип беҙгә хәбәр итте Мерәҫ ауыл биләмәһе башлығы Таңсулпан Хафизова.

Биш көн дауамында өмә менән "Еңеү" паркының ҡоймалары ремонтланған. Был эштә ауылдың ир-егеттәре ихлас әүҙемлек күрһәткән. Бигерәк тә Рәхмәтулла Әлибәков, Әнүәр Нәҙербаев, Әхтәм Хәсәнов, Кәрим Ситдыҡов, Юлай Сәйғәфәров, Рәил Даутбаев, Өлфәт Ямантаев бер көндө лә ҡалдырмай барып, ярҙам иткәндәр.

Өмәлә ҡатнашыусыларҙың барыһына ла ҙур рәхмәт, һаулыҡ-именлек теләйем, тип белдерә Таңсулпан Хафизова.