Баймаҡта хәҙер магазиндар күп булһа ла, барыһы ла эштән ҡайтҡанда барыбер сираттар була. Ошо уҡ ваҡытта магазинға йөрөгән ололар ҙа аптырата. Көндөҙ, кеше юҡта, иркенләп һатып алып ҡалмай. 3-4 йәштәге кескәйҙе етәкләгән йәш ҡатын да сиратта тора. Бала: “Әсәй, жевачка, әсәй, шоколад...”-тип бер туҡтауһыҙ мыжый. Әсәһе “юҡ” тип ҡарай, бала иҙәнгә ятып илай башланы. Шул ваҡыт бер әбей: “Ҡыҙым, ал нимә һорай. Үҙем аҡсаһын түләрмен”,-тине.
Ҡатын “кәрәкмәй” тигәнде белдереп баш сайҡаны. Тик әбей ҡуймай, “алып бирәм” тип туҡтауһыҙ һөйләнә-бәйләнә. Шул саҡ кассир ҡыҙ балаға ҡарап: “Бөгөн беҙ жевачкалар һатмайбыҙ”,-тине. Бала: “Шоколад”,-тип ауыҙын асҡайны: “Шоколадты ла!”-тине. Ҡатын йылмайып, рәхмәт әйтеп сығып китте. Кассир ҡыҙ әбейгә ҡарап: “Инәй, баланың битен күрмәнегеҙме ни? Бите диатездан сыбарланып бөткән. Ярамай уға кәнфит! Ә һеҙ асыуланып тороп аҡса тәҡдим итәһегеҙ”,-тип ҡуйҙы.