Данил Рәсәй чемпионатына юлланасаҡ

Данил – Рәсәй чемпионатына юлланасаҡ!

21-27 мартта Мордовия Республикаһының Саранск ҡалаһында 2007-2008 йылғылар араһында бокс буйынса Волга буйы федераль округы беренселеге үтте. Унда бөтәһе 200-ҙән ашыу, шул иҫәптән Башҡортостандан 20 спортсы ҡатнашҡан. Улар иҫәбендә 4-се лицей уҡыусыһы, ҡаланың балалар һәм үҫмерҙәр мәктәбе тәрбиәләнеүсеһе Данил Мостафин да (тренеры Достон Рустамов) була.

Һүҙ юҡ, бындай юғары кимәлдәге ярышта иң-иңдәр генә ҡатнашыу хоҡуғын яулай. Шунлыҡтан алыш бик көсөргәнешле бара. Данил Мостафин үҙ кәүҙә ауырлығындағы категорияла 4 тапҡыр майҙанға сыға. Алыш бик тә етди була. Ә шулай ҙа Баймаҡ егете еңеү яулап, чемпион исемен яулауға өлгәшә. Бының менән ул йәйгеһен Анапа ҡалаһында уҙасаҡ Рәсәй беренселегендә ҡатнашыу хоҡуғын алды. Уға тағы ла маҡсатына өлгәшеүен һәм ҙур еңеү яулауын теләйбеҙ!

Әйткәндәй, Данил Мостафин - Башҡортостан Республикаһы йыйылма командаһы иҫәбендә тора.