Хоккей уйнарға әҙерләнәбеҙ

Иҫке Сибай ауылында бына бер нисә йыл инде ҡыш айҙарында хоккей майҙансығы эшләп килә. Йәштәрҙең һәм балаларҙың яратҡан урыны ул! Күптәр буш ваҡыттарын нәҡ сәкән һәм коньки менән үткәрергә ярата. Быйылғы ҡыштың ғәҙәттәгенән һуңлап килеүе, ошо көнгә ҡәҙәр ҡар булмауы бер аҙ тотҡарлыҡ яһаһа ла, ниһайәт, күмәк көс менән боҙ майҙансығы булдырылды. Хоккей уйнарға яратыусылар, ял көндәрендә өмә яһап, майҙансыҡҡа бер нисә йөк ҡар ауҙарҙылар һәм уны тигеҙләп, түшәп сыҡтылар. Ә "Сибай" торлаҡтан файҙаланыу идаралығы эшселәре үҙҙәренең етәкселәре Наил Рәфҡәт улы Дәүләтбаев менән бергә майҙансыҡҡа һыу һибә һәм уның тигеҙлеген контролләй. Ошо көндәрҙә боҙ майҙансығында йәнә күңелле уйындар башланасаҡ!

МОТАЛ РӘМОВ.